Komentario: Deployment ban dagiti OFW sadiay Kuwait | Tawid News Magazine - Weekly Ilocos News 📰

Deployment ban dagiti OFW sadiay Kuwait

SOLBAREN ti naun-uneg a ramut ti problema tapno malapdan ti pannakagundaway ken pannakaidadanes dagiti Overseas Filipino Workers nangruna dagiti domestic and household workers sadiay Kuwait, saan ketdi a pannakaiyetnag ti laeng iti deployment ban.

Dayta ti sangsangkamaysa a kananakem dagiti adu a Pilipino iti pannakapapatay ni Jeanalyn Villavende, ti balasang nga OFW a taga-South Cotabato ken naabuso ken napapatay sadiay Kuwait.

Iti pannakayawid iti bangkay ni Villavende iti Pilipinas ket dandani saan a nabigbig ti pamiliana ti langa ti agkabannuag nga OFW iti kakaro ti kimmutonganna iti las-ud laeng ti sumagmamano a bulan a kaaddana sadiay Kuwait a mangipaneknek ti kinakurang ti taraon ken pannakamaltratona. Iti panangisayangkat ti National Bureau of Investigation iti autopsia, naduktalan dagiti adu a sinagabana a pannakaparparigat ken pannakarames ti kinababaina. Natakuatan pay nga awanen dagiti dadduma nga organ wenno naguneg a paset ti bagina.

Gapu iti napasamak ken ni Villavende, inrekomenda ni Labor and Employment Secretary Silvestre Bello III ken ni Presidente Rodrigo Duterte ti deployment ban dagiti OFW iti Kuwait kangrunaanna ti pannakaipatulod dagiti baro wenno agdadamo a domestic and household workers wenno katulong iti dayta a bassit ngem nabaknang a pagilian. Dagus met nga inaprobaran ni Presidente Duterte ti OFW deployment ban iti Kuwait ta narurod pay gapu ta ti kaso ni Villavende ket umasping iti nasapamak ken ni Joanna Demafelis a pinapatay dagiti amona a Syrian sadiay Kuwait idi 2018 a naduktalan ti bangkayna a nakadulin iti freezer.

Iti napasamak ken ni Demafelis ket nangparnuay iti saan a nasayaat a foreign relation ti Pilipinas ken Kuwait a nakaigapuan ti pannakayetnag ti deployment ban dagiti baro ken agdadamo a domestic and household workers iti dayta a pagilian. Naikkat laeng ti deployment ban idi naaramid ti Memorandum of Agreement dagiti pannakabagi ti Pilipinas ken Kuwait para ti naan-anay a proteksion ken pannakasaluad ti interes ken pagsayaatan dagiti OFW iti dayta a pagilian.

Kalpasan laeng iti nasurok a makatawen a naduktalan ti pannakaabuso ken pannakapapatay iti maysa a domestic and household worker sadiay Kuwait ket naulit manen iti kinatao ni Villavende. Mapapati a kalaksidan iti kaso ti panagabuso ken ni Villavende ket adda pay dagiti sabali a magungundawayan ken maidaddadanes ti karbenganda sadiay Kuwait ngem saan laeng a maam-amuan ti publiko gapu ta kurang ti monitoring ti gobierno ken dagiti recruitment agencies a nangipatulod kadagiti OFW sadiay Kuwait.

Adda dagiti natudingan nga ahensia ti gobierno a mangpasingked iti seguridad dagiti OFW kangrunaanna ti Overseas Workers’ Welfare Administration ken ti Philippine Overseas Employment Administration a mangisagana ken mangsagat kadagiti OFW a mapan agtrabaho kadagiti nagduduma a pagilian. Ngem saanda met a nainget a masaluadan ti interes dagiti OFW no addadan kadagiti pagtrabahuanda, ket agdepender laengen kadagiti recruitment agencies, ken kaaduanna nga agaksionda laengen no adda dagiti maawatda a reklamo.

Nagadun dagiti kontrobersial a kaso a pakaseknan dagiti naabuso nga OFW nangruna kadagiti pagilian dagiti Arabo, kas ti kaso idi 1994 ni Sarah Balabagan, ti menor de edad a napan nagtrabaho sadiay United Arab Emirates ket napapatayna ti amona a lalaki a nanggandat a nangrames kenkuana. Nabalud iti makatawen ken nasentensiaan idi ni Balabagan iti firing squad, ngem nalisianna ti dusana idi adda negosiante a pilantropo a nangbayad ti “blood money” a kaibatogan ti pannakapapatayna iti amona.  

 Nagadun dagiti estoria ti pannakaabuso dagiti OFW nangruna dagiti katulong wenno domestic helpers iti nagduduma a pagilian iti lubong ket kaaduanna dagiti agtatrabaho kadagiti Arab countries. Adun dagiti nagkauna nga estoria ti panagrames ken nasikogan wenno naanakan dagiti lallaki nga employer-da, adda dagiti kaso a nagimonan dagiti babbai nga assawa dagiti amoda a lallaki a gapu ti pannakamaltratoda. Adda dagiti kaso iti sobra ti kapaut a panagtrabaho ken kinakurang ti kanen ken panaginanada. Adda dagiti report a maturog dagiti domestic helper kadagiti nailet nga espasio. Sabali pay ti saan a pannakatungpal ti kontrata aglalo iti sueldo.

Iti laksid dagitoy a pasamak, adu latta dagiti babbai a mayat a mapan agtrabaho iti ballasiw-taaw kas domestic and household worker wenno agbalin a katulong iti pagtaengan. Gapu iti rigat ti panagbiag ken kinakurang ti pagsapulan iti Pilipinas, saan laeng a dagiti nababa ti adalna dagiti mayat nga agbalin a domestic worker, ngem uray pay dagiti nagturpos iti kolehio ken addan regular a trabahona. Mapilitanda a pumanaw a mapan makigasanggasat iti sabali a pagilian ta awan ti mastrekanda a trabaho a makaipaay iti nasayaat a sueldo nga umanay a pangsuportada iti panagbiagda ken dagiti pamiliada.

Iti likudan dagiti estoria ti trahedia ken kinadaksanggasat dagiti dadduma a domestic and household workers iti ballasiw-taaw, ad-adu dagiti OFW a nagdur-as ken simmayaat ti kasasaad ti panagbiagna ken dagiti pamiliada gapu ta nakatumpongda kadagiti nasayaat nga amo wenno employer.

Maibilang dagiti OFW kas baro a bannuar iti Pilipinas gapu kadagiti saan a magatadan a sakripisioda para kadagiti pamilia ken iti pagilian. Babaen kadagiti adu nga ipawpaw-itda a doliar ken dadduma pay a foreign currencies ket isuda ti mangsalsalbar ti ekonomia ti Pilipinas iti tiempo ti krisis iti ekonomia.

Kas bannuar, rebbengna a supapakan met koma ti gobierno iti nasaysayaat ken napudno a serbisio dagiti OFW nangruna kadagiti agtatatrabaho kadagiti napeggad a kasasaad agraman dagiti agpapaay kas domestic and household workers a babbai ta isuda ti kaaduan ken kangrunaan a maab-abuso ken magungundawayan.

Ikagumaan koma ti gobierno ti mangpadur-as ti ekonomia tapno mapataud dagiti adu a nasayaat a trabaho ken pagsapulan tapno maisardengen ti kultura ti panagipatulod kadagiti domestic and household workers tapno maigibuston ti pannakaabuso dagiti OFW sadiay Kuwait ken kadagiti nagduduma a pagilian. ●