Deployment ban iti 41 a pagilian, maysa a kita ti diskriminasion (Maikadua a paset)

Komentario ni Tatang Lakay

 Iti paniriganmi, maysa pay a naipangruna koma a pagbatayan ti POEA ti rekord ti maysa a pagilian mainaig iti pannakatratar kadagiti mangmangged  tapno maipakat kadakuada ti deployment ban. Saanna a kayat a sawen a no saan a compliant ti maysa a pagilian kadagiti paglintegan ti internasional a komunidad, garantisado a maabuso ti kalintegan ti maysa nga OFW no mapan mangged kadagitoy a pagilian. Iti sabali a bangir, saanna a kayat a sawen a no signatorio ti maysa a pagilian kadagiti bilateral a katulagan, garantisado metten a saan a maabuso dagiti mapan mangged kadagitoy a pagilian.

Sukimatentayo dagiti pagilian a naipakatan iti deployment ban. Agpayso, pakababalawanda ti kaawan ti bilateral agreeement a simrekanda iti pagiliantayo, wenno kaawan ti lintegda a mangsallukob kadagiti mangmangged iti pagilianda, wenno saanda a signatorio kadagiti deklarasion, konbension wenno resolusion, ngem naipanurok kadi ti rekord ti pannakaabuso dagiti mapan mangged kadagitoy a pagilian?

Adu met kadagitoy non-compliant a pagilian ti mangit-ited kadagiti mangmangged a ganggannaet iti pagilianda ti respeto ken panangbigbig iti kabaelan ken kalinteganda isuna laeng ta awan ti bilateral a katulaganda iti Pilipinas wenno iti kaawan pay ti labor wenno social laws a naputar tapno masalakniban dagiti mangmangged iti pagilianda. Ngem iti biang ti POEA, saan a natalged a mapan panggedan dagiti kailiantayo agsipud ta nagkamtud dagitoy nasao a pagilian kadagiti garantia a saan a maabuso ti kalintegan OFWs kadagitoy a pagilian.

No adda man dakkel a pakatikawan wenno pakababalawan daytoy a polisia ti POEA ti pannakairagup dagiti babassit a pagilian a naipakatan iti deployment ban iti listaan ti Afghanistan, Iraq, Lebanon, Libya, ken posible ti Palestine. Sabali dagitoy a pagilian. No kitaen ti rekord dagitoy a pagilian, naipanurok ti pannakaabuso ti kalintegan dagiti ganggannaet nga agtrabaho kadagitoy a lugar. Malaksid dayta, nariribuk ken saan a natalingenngen ti situasion politika kadagitoy a pagilian, napeggad ken saan  a natalged a pagtrabahuan dagiti kailiantayo wenno asinoman a mangmangged.

Iti pannakairagupda kadagiti pagilian a nairaman iti listaan dagiti pagilian a maibilang a non-compliant gapu iti kaawan dagiti bilateral laws ken dadduma pay a paglintegan maipapan iti panggedan ken kalintegan pantao ket saan a maikanatad.

Iti paniriganmi, rumbeng laeng a  mailaksid dagitoy a pagilian agsipud ta kaadduanna kadagiti pagilian a nairagup kadakuada ti naipasngay manipud iti kolonisasion ken panangituray ti sabali a pagilian ngem timmakderda a mangsurot iti nainkappian ken demokratiko a panagbiag.

Makitami ti dakkel nga abut a pakatinnagan daytoy a polisia ti POEA a panagbatayna laeng kadagiti katulagan wenno bilateral agreements ken no signatory iti internasional a konbension, deklarasion ken paglintegan tapno maibilang ti maysa a pagilian a compliant iti RA 10022. Kinapudnona, adu dagiti nabaknang a pagilian saan laeng iti Middle East, no di pay iti Europa, Amerika, East Asia, ken iti Pasipiko a nagdudupudopan dagiti mangmangged a Pinoy a nupay adda bilateral agreementda iti Pilipinas ken labor ken social a linteg para iti pannakasaluad dagiti OFWs, kasta met a  nakipagpirmada kadagiti katulagan kadagiti konbension, deklarasion, resolusion ken  paglintegan ti internasional a komunidad para ti pannakasalaknib dagiti mangmangged, ngem naipanurok met ken agdadata ti pannakaabuso iti kalintegan dagiti mangmangged kadagitoy a pagilian. Iti nalawlawag a pannao, awan ti panangipirpiritda kadagitoy a katulagan a nagpirmaanda. Makuna pay ketdin a simrekda kadagitoy a bilateral agreements kas pormalidad laeng tapno agparang laeng a sumursurotda iti paglintegan ti internasional a komunidad ngem ti makadakes, aramatenda ketdi daytoy a panggundaway kadagiti mangmangged iti pagilianda.

(Maigibusto)