Deployment ban iti 41 a pagilian, maysa a kita ti diskriminasion (Maudi a paset)

Komentario ni Tatang Lakay

 

Kaadduanna kadagiti Middle East countries ti saan a karaman iti listaan a pakaipakatan ti deployment ban. Kayatna a sawen a compliant dagitoy a pagilian. Ngem nakaam-amak ti rekord dagitoy a pagilian mainaig iti pannakaabuso ti kalintegan dagiti mapan mangged iti lugarda.  Paneknekan dayta dagiti nagkaadu a bilang dagiti naabuso a kailiantayo a naglibas manipud kadagiti amoda wenno pagtrabahuanda ket nagpakni wenno nagkamangda kadagiti embahada ti pagilian. Nairepreport dagitoy a kasasaad dagiti kailiantayo a nagtrabaho ken agtrabtrabaho iti Middle East countries.

Ngem ti adatna, apay a di inraman ti POEA dagitoy a pagilian a mapakatan iti deployment ban? Simple ti sungbat: gapu ta rinibribu ti bilang dagiti kailiantayo nga agtrabtrabaho kadagitoy a pagilian ket sigurado a mabkangan ti gobiernotayo iti ibabassit ti remittances manipud kadakuada no bilang saandan a mapalubosan nga agtrabaho pay iti Middle East countries.

Iti sabali a bangir, kas inannugot ti maysa nga opisial ti POEA, saan nga apektado ti pagilian iti pannakaipakat ti deployment ban kadagiti nadakamat a 41 a pagilian agsipud ta bassit laeng ti bilang dagiti mangmangged a Pilipino kadagitoy a lugar. Iti ababa a pannao, bassit unay dagiti remittances manipud kadagiti bassit ti bilangda a kakailiantayo nga agtrabtrabaho kadagitoy a pagilian no maidilig kadagiti aggapu kadagiti dadakkel a pagilian, kas iti USA, Middle East countries, ken Europa.

Saan kadi a nalawag a diskriminasion daytoy?

No sinsero ti POEA a mangisakit kadagiti OFWs,  ilawlawa koma ti gobierno ti pangipakatanna iti deployment ban ket karaman dagiti pagilian iti Middle East a pagtataudan dagiti adu a report ken complaint iti nakaro a  pannakaabuso dagiti Filipino a mangmangged kadagitoy a pagilian.

Saan koma a dagiti laeng babassit a pagilian ti puntiria ti POEA a paritan a pagtrabahuan dagiti OFWs, kangrunaanna ketdi dagiti baknang ken dadakkel a pagilian a naipanurok ti panangabusoda kadagiti kailiantayo a mangmangged uray iti baet nga adda dagiti nakipinnirmaanda a bilateral agreement a mangsalaknib iti kalintegan dagiti OFWs.

Aduda dita a pagilian, nangruna iti Middle East. Ti saan a mailibak, rinibribu dagiti OFWs nga agtrabtrabaho kadagitoy a nasion.  Nupay agdadata dagiti rekord ti pannakaabuso ti kalintegan dagiti kailiantayo kadagitoy a pagilian, agguddeng la ketdi ti gobiernotayo a mangiparit iti panagtrabaho dagiti kailiantayo kadagitoy a pagilian gapu iti minilion a doliar a remittances nga ipatpatulodda ditoy pagilianda.

Dagiti ketdi kadaraantayo a mangmangged kadagiti babassit a pagilian ti minarkaan ti POEA a non-compliant iti pannakasalaknib iti kalintegan dagiti OFWs ti maisakripisio agsipud ta saanda a makaapekto iti maipatpatulod a remittances iti Pilipinas gapu iti kinabassit ti bilangda.

Iti paniriganmi, nangkali laeng ti pagiliantayo iti abut a narigatna a pakaalut-otan. Iti daytoy nga inaramidna, posible nga agbomerang iti pagiliantayo ti panangiparitna iti ipapan panagtrabaho dagiti kailiantayo kadagitoy a pagilian. Ita pay, mapagamkanen ti backlash manipud kadagiti pagilian a nakaipakatan ti deployment ban ket saanda metten nga aggawat kadagiti kailiantayo a mapan mangged iti lugarda. Namak payen no agbalin a puntiria ti diskriminasion dagiti kailiantayo nga agtrabtrabaho kadagita a pagilian gapu ta napasugkian dagiti agtuturayda iti daytoy a polisia ti POEA?

Kasapulan nga ipasuli pay laeng ti gobiernotayo daytoy a polisia ti POEA ket adalenna ti posible nga implikasion ken repercussion daytoy kadagiti maapektaran nga OFWs nga agtrabtrabaho kadagitoy 41 a pagadalan a sinaklaw ti deployment ban.#