Deployment ban iti 41 a pagilian, maysa a kita ti diskriminasion (Umuna a paset)

Komentario ni Tatang Lakay

Inwaragawag itay nabiit ti Philippine Overseas Employ-ment Administration (POEA) ti pannakaaprobar ti deployment dagiti Overseas Filipino Workers kadagiti 49 a pagilian ken ti deployment ban dagiti OFWs kadagiti 41 a pagilian.

Dagiti sumaganad dagiti pagilian  a saklawen ti deploy-ment ban: Afghanistan, Antigua, Barbuda, Barbados, Cambodia, Cayman Islands, Chad, Croatia, Cuba, North Korea, Dominica, East Timor/Timor Leste, Eritrea, Haiti, India, Iraq, Kyrgyzstan,  Lebanon, Lesotho, Libya, Mali, Mauritania, Montenegro,  Mozambique, Nauru, Nepal,  Niger, Pakistan, Palestine,  Serbia, St. Kitts, Nevis, St. Lucia, St. Vincent, the Grenadines,  Sudan, Swaziland,  Tajikistan, Tonga,  Turks,  Caicos, Tuvalu,  US Virgin Islands, Vanuatu, ken  Zimbabwe.

Iti umuna a panangtaldiap, kaaduanna kadagiti 41 a nadakamat iti ngato a sinaklaw ti deployment ban ket babassit a pagilian, no ar-arigen ket mangrugrugida a tumakder, ken maibilang a napanglaw pay laeng ti ekonomiada.

Ketdi, mapaliiw a kasapulanda ti expertise dagiti skilled ken propesional a mangmangged (saan laeng a Pilipino), ken posible dagiti migrant workers nga agtrabaho iti pagtaengan ken pabrika dagiti adda mabalinda nga agindeg.

Ngem kuna ti POEA nga awan ti garantia ti pannakasalaknib ti kalintegan dagiti kailiantayo a mapan mangged kadagitoy a pagilian.

Daydiay naipapel ken pirmado a katulagan ti gobiernotayo ken ti gobierno dagitoy a pagilian ti pagbatbatayan a garantia ti POEA. Iti kaawan daytoy, ibilangna a non-compliant dagitoy a pagilian iti polisia ti pagiliantayo a kaadda ti garantia a masalakniban dagiti kailiantayo a mangmangged wenno mapan mangged kadagitoy a pagilian.

Kas sagudayen ti RA 10022, kasapulan uray maysa kadagiti sumaganad kas garantia para iti pannakasalaknib ti kalintegan dagiti kailiantayo a kas overseas Filipino workers:  kaadda dagiti labor ken social laws a mangprotekta iti kalintegan dagiti mangmangged, a paka-iramanan dagiti migrant workers; wenno signatory iti ken/wenno nakipagratipika kadagiti multilateral conventions, deklarasion wenno resolusion mainaig iti pannakasalaknib dagiti mangmangged, pakairamanan dagiti migrant workers; ken kaadda iti bilateral agreement wenno arrangement iti gobierno mainaig iti pannakasalaknib dagiti kalintegan dagiti OFWs.

Iti umuna a panangtaldiap, nasayaat ti panggep daytoy a paglintegantayo. Kayatna a masalakniban dagiti kalintegan dagiti kailiantayo iti panagtrabahoda iti sabali a pagilian. Tapno saanda a maabuso ken biktima iti pananggundaway. Ngem saan a makapnek a pagbatayan a maipakat ti deployment ban iti maysa a pagilian gapu laeng ta awan ti bilateral agreement wenno sosial and lokal a lintegda, wenno saanda a signatoria kadagiti katulagan, deklarasion wenno resolusion para iti pannakasalaknib dagiti mangmangged.

(Adda tuloyna)