In-depth investigation iti pannakapapatay ti barangay captain, imbilin ni Gov. Singson

VIGAN CITY – Imbilin ni Gov. Ryan Singson iti hepe ti kapolisan ditoy probinsia ti panangisayangkatna iti naun-uneg a panagimbestiga mainaig iti pannakapapatay ti maysa a barangay captain iti national highway sadiay Barangay Dan-ar idi agsapa ti Disiembre 4.

Bayat ti pannakiuman kenkuana da Chato Alda, manager ti DWRS, ken ni Eugene Paet, anchorman, a naipatangatang iti Ilocos Sur Hotline idi Disiembre 7, kinuna ni Gov. Ryan Singson nga adda marching ordersna ken ni Senior Supt. Jemar Delgado Modequillo, provincial director, a mangiwayat iti naun-uneg nga inbestigasion mainaig iti pannakapapatay ni Barangay Captain Antonio Valdez y Laranang, 55, naasawaan, retirado a polis, ken residente iti Barangay Salincub, tapno maammuan no ania ti pudno a napasamak.

Dead on arrival iti ospital Valdez gapu iti panangpaltog kenkuana ti dua a lalaki a nakalugan iti motorsiklo iti national highway a sakup ti Barangay Dan-ar ditoy nga ili idi agsapa ti Disiembre 4.

Indeklara ti doktor ti Candon  General Hospital a nakaitarayanna nga awanen ti biag ti barangay captain   gapu kadagiti grabe a sugatna iti tengngedna.

Nagsagrap met iti sugat iti ulo ken bagina ti insakay ni Valdez a nainaganan Bryan Ellorin y Ellorin, 29, naasawaan, ken residente met laeng iti nadakamat a barangay.

Saan pay a nabigbig dagiti nangisayangkat iti krimen kasta met ti motibo ti pammapatay ngem kitkitaen dagiti inbestigador no adda pakainaiganna iti kalkalpas a barangay election wenno iti kinapolis idi ti biktima.

Kinuna ni Singson nga adda dagiti haka-haka a dimmanon kenkuana mainaig iti pannakapapatay ni Valdez ngem iyurayna ti resulta ti maiwayat nga inbestigasion tapno maammuan no ania ti pudno a napasamak ken iti  pannakasolbar ti krimen iti kabiitan a panawen.

Iti inisial a panagimbestiga dagiti polis, agdaldaliasat nga agpaamianan ti Honda Wave a minaneho ni Valdez ket idi makadanonda iti nakapasamakan ti krimen, kellaat nga immabay ti sumarsaruno kadakuada a motorsiklo a nagluganan dagiti suspek ket pinaltogan ti back rider ti biktima a nakatamaan ti makannigid a tengnged ti barangay captain.

Gapu iti pannakapaltog ni Valdez, naidungpar ti motorsiklona iti sementado a bangen iti akindaya nga abaga ti kalsada.

Naglibas dagiti suspek iti saan nga ammo a direksion kalpasan ti pammaltog.

Nangisayangkat dagiti nagresponde a polis iti hot pursuit operation ngem saandan a nasapulan pay dagiti suspek.

Nakarekobre dagiti inbestigador manipud iti SOCO team a naggapu iti Candon City Crime Laboratory iti maysa a kapsula a mapapati a nagtaud iti cal. 45 pistol iti nakapasamakan ti krimen.

Iti pannakaisurat daytoy, agtultuloy ti panagimbestiga dagitri polis mainaig iti nasao a pammapatay.#