Dialogo kadagiti agmulmula iti tabako, naisayangkat

CANDON CITY – Maikkan koma iti direkta nga assistance dagiti mannalon iti tabako tapno ad-adu pay ti maapitda ken napinpintas ti klase daytoy a produkto a kangrunaan a pagsapulan dagiti mannalon iti Region 1 a pakaibilangan ti Ilocos Sur.

Kinuna ni National Tobacco Administration chief Edgardo Zaragoza nga ikalikagumto ti opisinana kadagiti lokal a gobierno ken maseknan nga ahensia ti gobierno ti pannakaited  ti direkta a tulong kadagiti agmulmula iti tabako bayat ti Farmers’ Consultation and Dialogue a tinabunuan dagiti nasurok dua gasut a mannalon iti maikadua a distrito a naangay iti pasdek ti nasao nga ahensia ditoy siudad idi Marso 25.

Impanamnama pay ti administrador ti pannakaiyimplementar dagiti proyekto ti irigasion kadagiti talon tapno adda pamataudan iti danum a kasapulan dagiti tabako tapno nasayaat ti kalidad dagiti maapit a bulong ti tabako ken magun-od ti nangato a nikotina a kasapulan dagiti agparpartuat iti sigarilio.

Nadakamat ni Zaragoza a kasapulan ti de-kalidad a produksion ti tabako nangruna iti panagmula iti high nicotine wenno high flavor a variety ta daytoy ti kasapulan dagiti agar-aramid iti sigarilio ken iti international market.

Kabayatanna, naigiddan ti dialogo ti pannakapadayaw dagiti mannalon nga addaan iti nasayaat a rekord kas dagiti mannalon a kaadduan ti naapit a tabako, dagiti kangatuan iti percentage grades dagiti mulada a tabako, kaadduan ti naimula a kayo iti maysa a tawen, ken dagiti nakaaramid kadagiti labor saving devices tapno mapabassit ti mabusbos ti mannalon iti panagmulana iti tabako.

Napadayawan pay dagiti mannalon nga umuna a nakabayad iti tobacco production assistance manipud iti nasao nga ahensia.

Naited kadagitoy kas premioda dagiti kasapulanda iti panagtalonda, kas iti botas, face mask, antiparra, diaket, thermos, flashlight, ken dadduma pay ramit. (Manipud iti report ni Danny Antalan)