Dialogo nagbaetan NTA, mannalon, naisayangkat

CANDON, Ilocos Sur – Maysa a dialogo iti nagbaetan ti dadaulo ti National Tobacco Administration ditoy maikadua a distrito ken dagiti mannalon ti naangay iti Candon Civic Center idi Abril 27.

Mismo a ni NTA Administrator Edgardo Zaragoza ti nangidaulo iti dialogo a tinabunuan ni dati a House Deputy Speaker Eric Singson ken dagiti opisial ti NTA-Candon ken dagiti agmulmula iti tabako iti maikadua a distrito ti probinsia.

Kangrunaan kadagiti problema a natratar iti nasao a dialogo ti sistema ti panagrado dagiti trading centers iti naluto a bulong ti tabako ken ti presio daytoy a produkto iti daytoy a tobacco season.

Kinuna ni Zaragoza nga itext laeng dagiti mannalon kenkuana no adda problema iti pannakagrado dagiti lakoda a tabako tapno sigida a mapaaksionanna kadagiti empleado ti NTA a natudingan nga agbantay kadagiti trading centers.#