Dianitor laeng, dimo kunkuna

Sinurat ni Jose Edwin S. Sajonia

Ā 

Dianitor laeng, nagbaba man, dimo kunkuna ta natan-ok daytoy nga obra iti maysa a kompania wenno institusion. Malalais idi un-unana ta sagbibinting pay la idi ti pangontaranda iti sueldona iti per ora, ngem itan, amangan no daydiay agdildillaw ket narigat pay a maalan a dianitor no agaplay koma nga agtrabaho met.

Para-sagad, para-urnos, para-sibug kasilia, para-nasnas kunkunada lang ngem atiw metten ti dianitor tatta ti propesional no maikompararĀ  idi un-unana ta ngimmato metten ti sueldona. Naipaset pay ketdin iti rationalization a maysa a napateg a posision ti kinadianitor ta agduduma ti appointment-na: adda dianitor a regular, kontraktual wenno job order (JO).

Ala, adda met gundaway ni Apo Dianitor a maipromot no naanus ken nadiskarte. Kas idi uso pay laeng ti mimeographing machine, adda naam-ammomi a nagdianitor ngem college level isuna.Ā  Nalaing ni Marco nga agmakinilia. Nadiskubre ti clerk daytoy nga abilidadna ket pinadasna a pinag-type ni Marco no kasta nga aginanadaĀ  ken kaawan dagiti kaopisinaanda. Mayat ti panagramasna iti teklado ti makinilia. Rineggetanna pay a sursuruen a maneharen ti mimeographing machine.

Nairana a nagsakit ti clerk ket nagikamat dagiti mangisursuro iti test papers. Nagbirok ti principal iti makabael nga ag-mimeo. Nagboluntario ni Marco.Ā  Ania pay, straight a makalawas a nag-mimeo isuna. Kinantiawanna dagiti kakaduana a dianitor ta impaobra ti principal kadakuada dagiti pagrebbenganna a sagadan.

Manipud idin, manmanon nga agsagad ken agbagkat ni Marco. Idi nagabroad ti clerk ta napan nagsapul iti naberberde a pagaraban agsipud ta agkolehio metten dagiti annakna, ni Marco ti naisukat ket nakaliklik isunanĀ  iti nadulpet nga obra. Mangopisinan!

Sabali met ti estoria ni Robert. Dianitor ni Robert iti maysa a nalatak a kompania ti maysa a taipan (nabaknang a negosiante). Ad-adda nga am-ammo ni Mr. Lee, bossing ti kompania, ni Robert ngem dagiti gagangay nga obrerosna agsipud ta mensahero ken bugadorna iti pappapananna.

Naminsan, intugot Mr. Lee ni Robert idiay Amerika ta magustuanna a katulong ken mapagtalkanna. Idi nagawid ni Mr. Lee iti Pilipinas, imbatina ni Robert iti sanga ti kompaniada kas dianitor. Dinurogan dagiti agtrabtrabaho iti opisinada ken uray dagiti imigrante a kabagianna ni Robert nga ag-TNT ken agbirok iti sabali a trabahona bayat ti kaawan ti bossna. Ngem dina ginandat daytoy. Intuloyna ketdi ti trabahona iti kompania. Dina kayat a dadaelen ti panagtalek ti bossna.

Idi nagsubli ni Mr. Lee, inkuyognan a nagawid. Nasdaaw ni Robert idi sumangpetda ta maipromot metten ket saanen a dianitor ti obrana no di ket agbalinen a tour aide ni Mr. Lee kadagiti panagbiahena iti nadumaduma a pagilian a disso ken sanga ti negosiona.

Uray ania ti klasena a trabaho, nadayaw basta ipasnek ti maseknan. Basaem ti pakasaritaan dagiti nagballigi a tattao ket manmano kadakuada tiĀ  nangrugi a dagus iti dakkel a puesto no di ket iti baba – para templa iti kape, para sagad, para punas ken kadawyan a para puspos itiĀ  opisina.

Arakennaka ti oportunidad no napudnoka iti trabahom, kas iti napasamak kadagiti nadakamat iti ngato a dianitor.

Saanmo koma ngarud a laisen ti nababa a trabaho. Yamanem ketdi ta adda pangrugian nga idiaya dagiti adda ti mabalinna a parsua tapno adda pagpangalan dagiti nababbaba iti kasasaadna a sumaliwanwan met.#Ā