Dikayo paallilaw iti text scams: DTI

DAGUPAN CITY – Binallaagan manen ti Department of Trade and Industry ti publiko iti saanda a panamati kadagiti text scams tapno saanda a mabiktima.

Inyunay-unay ti maysa nga opisial ditoy iti publiko a no makaawat iti text message a nangabak iti balay, lote, kuarta, nangina a lugan wenno dadduma pay uray no saanda a nakiripa wenno awan met ti ginatangda a tiket, saandan nga ipangpangag daytoy agsipud ta maysa la ketdi a pangallilaw kadakuada.

Kinuna ti opisial a sabali pay a modus operandi dagiti manglokloko ti panangipaayda kuno iti loan ngem masapul a bayadam ti processing fee sakbaymo a maala daytoy.

Sabali laeng ti mangipatulod iti text message nga agpammarang a kabagian ti puntiriada a biktimaen ket adda paw-itna a pakete. Kayat laeng dagitoy ti dumawat iti load, segun iti opisial.#