DILG officer, naitabon a di pay nalawag no ania ti pudpudno a nakatayanna

SAN JUAN, Ilocos Sur – Naitabon idi Pebrero 2 ti DILG officer a natay iti aksidente iti lugan iti baet nga adda dagiti saludsod no ania ti pudpudno a napasamak idi nakidinnungpar ti luganna iti maysa a wagon  sadiay Sitio Bossaoit, Barangay San Clemente, Magsingal, Ilocos Sur idi rabii ti Enero 16.

Iti interbio ti maysa a lokal a reporter iti radio ken ni Ethel Guerrero, asawa ni DILG Officer Jerry Guerrero, kinunana a madama ti panangadal ti abogadoda iti autopsia nga insayangkat ti doktor no napilidan daytoy kalpasan a mapapati a nakidinnungpar ti luganna iti maysa a wagon iti nasao a lugar.

Adda suspetsa ti natayan a napilidan ti DILG officer agsipud kadagiti sinagrapna a nakaro a dundunor iti baet ti imbaga ti hepe ti polis a limtuad iti panagimbestigada nga awan ti lemma ti pilid iti bagi ken ulo ti biktima.

Segun iti inisial nga inbestigasion dagiti polis iti Magsingal, agpaamianan a direksion ti Honda XRM a minaneho ni Guerrero ket mapapati a kimmaut iti linia ti Ford wagon a minaneho ti maysa a Luciano Mate Pascua Francisco, 49, naasawaan, residente iti Laoag City a puon ti nagdinnungparanda.

Nakaro ti dadael ti lugan ni Guerrero ken nagsagrap daytoy kadagiti grabe a sugat a puon ti nakaideklaraanna a natayen idi maidanon iti Magsingal District Hospital.

Saan a naan-ano ti drayber agraman dagiti pasaherona a pakairamanan ti maysa a dakkel a politiko.

Iti interbiona iti Barangay Commando Brigada a naipatangatang iti DWRS, kinuna ni COP Lucio Disierto a resulta ti napigsa nga impact ti panagdinnungpar dagiti lugan ken ti pannakaipalladaw ti DILG officer dagiti sinagrapna a grabe a sugat.

Kinunana pay a kas maibatay iti panagimbestigada, saan a napilidan ti biktima agsipud ta awan ti lemma ti pilid iti bagi ken ulo ti biktima.

Ngem suspetsa ti pamilia ti biktima a napilidan daytoy kalpasan ti napasamak a panagdinnungpar.

Kasta met a nadakamat ni Dr. Ronald Tobias, ti doktor a nangtaming iti biktima, nga iti kaadun dagiti tinamingna a pasiente a nakidinnungpar ti luganda, kaadduanna a natukkol dagiti tulang ti biktima, saanda a naburbor a kas iti sinagrap ti DILG officer.

“…Most probably a napilidan… nupay awan dagiti tire marks,” kinuna ni Tobias.

Kabayatanna, pinaglibakan ni Guerrero nga immannugotdan a makiareglo mainaig iti aksidente a nakatayan ti asawana.

Kinuna ti balo a kalpasan ti tabon, sanguennanton ti pannakaidarum ti nakadungpar iti lakayna.#