Dingnguen, inwaras ti gobierno probinsial

SAN JUAN, Ilocos Sur – Agduduma a dingo ti inwaras da Gov. Luis “Chavit” Singson ken Vice Gov. DV Savellano kadagiti nadumaduma nga asosasion iti probinsia bayat ti naangay a dispersal iti BArang-ay Demofarm itoy nga ili idi Disiembre 24.

Karaman dagiti naiwaras ti walo nga imported a toro a kalding, 6 nga urbon a baka, 300 a Peking duck ken nasurok 3,000 a piek a sasso.

Paset daytoy ti agtultuloy a programa ti gobierno probinsial a pannakapataud ti ad-adu pay a pagsapulan dagiti umili babaen ti panagtarakenda iti dingo iti paraanganda.

Nairugi idi 2008 bayat ti kinagobernador ni Savellano, maikkan iti 100 a piek ti maysa nga asosasion tapno taraknenda sadanto isubli ti walo inton agdagsenen dagitoy iti dua a kilo tapno maikkanda manen iti sabali pay a 100 a piek.

Maited met ti maysa a toro a kalding iti organisasion nga addaan iti 25 a native a kabay-an a kalding tapno daytoy ti mangmanada kadakuada tapno sumayaat ti puli dagiti mayanakda.

Naikkan met iti Peking duck dagiti estudiante a mangal-ala iti ISCC Demofarm Campus kas pangrugianda a negosio. Kas iti sasso, saan a kasapulan a pakanen iti feeds ti Peking duck, kasta metten a nangina ti karne daytoy.#