Dingnguen ti 33 barangay, napurga

CABUGAO, Ilocos Sur – Agtultuloy ti pannakapurga ken pannakabakuna dagiti dingnguen iti 33 a barangay ditoy nga ili kas paset ti direktiba ken programa ni Mayor Edgardo “Ediboy” S. Cobangbang, Jr., segun iti livestock inspector ti Departamento ti Agrikultura ti lokal a gobierno ditoy.

Kinuna ni Melvin Castro, livestock inspector ti DA, babaen ti nasamay a pannakapurga ken pannakabakuna dagiti dinguen ken ayup, malapdan ti panagraira ti sakit nga ephemeral fever (trangkaso ti ayup); respiratory diseases a kaaduan a sakit no kalamiis ti klima; maldigestion (di marunawan); heat stroke (masdo); gallstone (kidney, UTI kas met iti tao); dermatitis, bacterial diarrhea; chronic respiratory diseases (CRD), complicated with microplasma ken anti-rabies.

Impanamnama ni Castro a negatibo iti “avian birds flu” dagiti poultry farms ditoy nga ili ken kaduana ni Dante Naval, meat inspector ti LGU, a mangsiput nga awan ti maiserrek a naparti a dingnguen a natay iti sakit.#