Footer

Dios ti agbati, Luzviminda (Maikadua a paset)

Nakaem ni Abel ti sangina iti yaasibay ti ladawan ti masaksakit nga inana. Piman, naidalit  gapu iti pannakailidding ti kalinteganna!

Kukua ti amana ti nalawa a kataltalonan iti Buguias. Tawidna kadagiti appoda a nagdappat iti kabambantayan. Ngem ania ti napasamak? Dimteng da Don Miguel ken dagiti armado a pasurotna ket sinamsamda dagiti pagap-apitanda. Nagkamang ti amana iti pangukoman tapno itakderna ti kalinteganda.  Dita a nangrugi ti nadagdagsen manen a kalbarioda. Maysa a rabii, kinidnap ti anak ni Don Miguel ken ti dua a pasurot daytoy ti inana sada rinames iti kalapaw iti tengnga ti kataltalonan.

Saan a dimmur-as dagiti kaso nga impila ti amana iti pangukoman. Malaksid a naiwalang dagiti saksida, pinamelmelan ni Don Miguel iti pirak ti buklis a hues.

Maysa nga agsapa, nasarakanda laengen ti bangkay ti amana iti karayan a natatek iti bala.

Saan a nagawidan ni Abel ti panangmesmesna iti maletin a saklotna. Arig agaluyo ti rikna a pilit a mangiwallages iti natalinaay a panunotna.  Naamirisna itan: iti kabakiran ti biag, agraraira dagiti ayup, sisasagana a mangsakmal ken mangrutayrutay kadagiti nakapsut ken babassit!

Tinaldiapanna ni Elias. Kalmado ni Elias idinto a nakapusot iti tugaw. Iti tawenna a beinte tres, kayarigan ni Elias ti ub-ubing a Manny Pacquiao iti kasippukel ti pammagina. Opisial idi tii ROTC idi agbasbasa pay iti kolehio.

Kas kenkuana a biktima ti kinaranggas ni Elias. Periodista daydi Mang Luis Pascua nga amana. Saan a nagbuteng a nangibutaktak kadagiti anomalia a nakaisangkotan ni Diputado Arnel Tabangcura, kas iti overpriced a kalsada manipud iti ili ti San Jose a simmalput iti San Marcos. Inrakurakna dagitoy iti kolumna iti The Ilocos Sentinel.

Maysa a rabii kalpasan ti panangkoberna iti maysa a pasken iti ili ti San Nicolas, bayat ti panaggawidna a nakalugan iti motorsiklona, sinaruno ti maysa a motorsiklo a nagluganan ti dua a lalaki a nakauniporme iti polis ken nakabonite. Iti nagkurusan, inabay dagiti dua a lalaki ti motorsiklo ni Luis Pascua sa pinaputokan ti nagsakay iti likud.

Dua a bala ti simmalput iti bagi ni Luis Pascua. Naipuruak manipud iti naglugananna.

Dimsaag ti nagsakay iti likud, inasitganna ni Luis Pascua sana pinaltogan ti ulo ti naud-udi. Kalpasanna, kasla awan aniaman a naglugan iti motorsiklo ket immaweren ti luganda a nagpadaya.

Kas ken ni Abel, agal-alikubeng ti lunod iti barukong ni Elias. Maymaysa ti tuduenna a makabael a nagbilin iti pannakapapatay iti amana: ti diputado a linaon dagiti expose daydi amana.

“Kimat laeng ti di mabales, Abel!” nakunana idi naminsan kalpasan a naplantsada ti pananghaidiakda iti Bigaa Airbus.

Adda pagpatinggaan amin a kinadangkes, immapay iti panunot ni Abel. Itan ti panangibandoda iti lubong iti kinadangkok ken kinatiri dagiti agtuturay iti ilida!

Nasiputanna ti itatakder ni Elias. Simrek daytoy iti pagpaknian sa met la rimmuar kalpasan ti sumagmamano a darikmat. Tinung-edanna ni Abel.

Kinita ni Abel ti oras iti pungupunguanna. Alas nuebe. Immanges iti nauneg sa timmakder. Bitbitna ti maletin a simrek iti pagpaknian. Inlitekna ti serradura.

Indissona ti attache case iti suelo sa nagrukob. Kinarawana ti likud ti lat-ongan. Inakkalna ti naipagket a bungon. Inukarkarna ti bungon. Naitangkarang iti matana ti kuarenta y singko a paltog.

Talaga a mapagtalkan ni Andro, nakunana ti nakemna. Awan sawsawir a naisaganana amin a kasapulanda.

Agtigtiger ti imana a nangpidut iti paltog. Damona ti umiggem iti armas. Naimula ngamin iti isipna ti pammagbaga ti inana: ti agbibiag babaen ti igam, iti igam ti inna pakatayan!

Kellaat nga immagibas iti panunotna: kasanon no paayen ida ti gobernador? Maituredna ngata ti pumatay?

Kinutina ti abagana. Makaammodtan, nakunana iti nakemna.

Insakibotna ti paltog. Rimmuar iti pagpaknian. Nagpalikud kalpasan a tinung-edanna ni Elias.

Kellaat a ginammatan ni Elias ti stewardess sana inipig ti tengngedna.

“Hijack daytoy!” kinunana ket inwagisna ti paltog.

(Adda tuloyna)