Footer

Dios ti agbati, Luzviminda (Maikalima a paset)

“Saan kadi a nabayagen a naikamang dagita a kaso iti korte?” inamad ni Baluigas. “No diak agbiddut, nagbalin dayta a nasional nga isyo kalpasan a pinidut ti nasional a media gapu iti pannakairamraman a nagudas ti maysa a kameng ti lokal a media gapu iti naiwawa a bala.”

“Agpayso, ngem lumlumoten iti korte dagiti kaso ta tugtugawan ti hues a suspetsak a binayadan ni Mayor de la Cuesta,” insungbat ni Abel idinto a kinusilapanna ti manglaplapayag a mayor.

“Nadagsen dagiti pammabasolyo. Adda kadi dagiti saksi ken ebidensia nga ig-iggamanyo a mangpaneknek iti akusasionyo maikontra ken ni Mayor de la Cuesta?

“Adda idi dua a saksi ngem pinaipakni ni Mayor de la Cuesta ti maysa idinto a pinaammalanna iti kuarta ti maikadua tapno ibabawina ti statementda.”

“No awanen dagiti saksi, awan la ketdi ti pagdur-asan dagiti kaso,” kinuna ni Baluigas. “Agtungpal laeng a madismis ti kaso.”

“Ngem adda naduktalanmi a dua pay a saksi iti pannakaitalaw ken pannakapapatay daydi amak. Addada idi iti balay ni Mayor de la Cuesta idi planuenda ti pannakaipakni daydi amak. Kayatda ti agsaksi. Ammomi ti lugar a nagpaknianda.”

“No aglemlemmengda, kayatna a sawen nga agbutengda nga agsaksi.”

“Agamakda a rummuar gapu ta dida talken dagiti polis a a bataan ni Mayor de la Cuesta. Dayta ti gapuna a sika ti pinilimi. Ammomi a natibkerka a mangsukimat iti kinapudno. Ammomi a dinaka magemgeman ni Mayor de la Cuesta. Kayatmi a mapanmo ida tuntonen tapno lumtuadda a manglukais iti kinadakes ni Mayor de la Cuesta.”

“Baluigas, ballaaganka, dimo patpatien dagita!” kellaat a pimmasngat ni Mayor dela Cuesta. “Natangdanan dagita a mangperdi kaniak!”

Pinagsinnublat a minatmatan ni Baluigas da Abel ken Elias ken ti mayor.

“Adda kadi kaamakmo a matakuatak, Mayor?” kinuna ni Baluigas.

“Ania koma ti paggamakak? Adu dagiti saksik a mangpaneknek nga awan ti nakainaigak iti pannakapapatay ti amana!”

Pinerreng manen ni Baluigas da Abel ken Elias, kasna tuktukoden ti kinapudno kadagiti matada.

“Sige, tulongankayo,” nakunana idi agangay. Ngem masapul nga ipatalgedyo nga awan ti pakaan-annuan dagiti pasahero, nangruna ni Mayor de la Cuesta, agingga a diak makapatang dagiti kunayo a saksi,” kinuna ni Baluigas.

“Mangnamnamaka,” kinuna ni Elias.

Inruar ni Baluigas ti bassit a kuadernona. Nangpirgis iti maysa a panid sana inyawat ken ni Abel agraman ti bolpen.

Inkur-it ni Abel ti nagan dagiti saksi ken iti lugar a nagpaknianda. Binasa ni Baluigas sana pinisang iti sagbabassit ti papel. Nagtung-ed sa timmakder.

“Birokek ida, sadino man ti naglemmenganda. No pudno ti ibagbagayo, my God, adda la ketdi agtulid ti ulona!” kinuna ni Baluigas.

Pimmanaw ni Baluigas kalpasan ti panangpatibkerna iti pakinakem dagiti pasahero.

“No kasta, sika ti anak daydi Juan de la Cruz,” mangrukrukod ti mata ni Mayor de la Cuesta. “Kaska met la iti amam nga agir-iray iti kannigid.”

“Naimbag nga umili ti amak, dagiti marabrabngis ti kalinteganda a kailian ti tinultulonganna. Saan a makannigid a kas iti ipabpabasolmo kenkuana. Maysa ketdi a biktima iti gamrud a kas kenka a nangtagikua kadagiti daga a naglingling-etan a dinappat dagiti nagkauna a kaputotan ti amak.”

“Adda dokumento a pammaneknekko a daga daydi lelong daydi papang dagiti  kataltalonan iti dayaen ti Bigaa, agtutubo.”

“Nangalaam kadagiti dokumento, Mayor? Ammo ti sibubukel a Bigaa a dinappat daydi Don Tomas de la Cruz, a lelong daydi lelong daydi amami dagita a daga. Ti ketdi pudno, natagikuam dagita a daga babaen dagiti dokumento a naparbo babaen dagiti kumplotmo iti Agrario!”

“Tanangem ti agsarsarita, agtutubo. Saannak laeng a kadawyan a mayor ti Bigaa. Nagtaudak iti kaamaan dagiti Kastila nga immuna a simmanglad ditoy a lugar.”

“Istranghero laeng ti kunkunam a kaamaam ditoy Bigaa, Mayor. Daydi nagtaudan ti kaputotanmi ti pudpudno a natibo iti Bigaa ngem in-inut a pinastidiar dagiti rinuker a kaamaam.”

“Ania ti kayatmo a paruaren, agtutubo? Pinatalgedan ti korte a siak ti pudpudno nga akinkukua kadagita a daga ta tawidko kadagiti nagkauna a kaputotanmi.”

“Gapu ta pinamalmalam ti hues, Mayor! Ngem saanka a napnek, pinapataymo pay daydi amak tapno awanen ti lapped a matagikuam dagita a daga. Malaksid dayta, rinames pay ti anakmo ti inak a puon ita ti pagsagsagabaanna iti nakana! Ngem saan nga agnanayon a maleplepam ti kinapudno. Ita nga aldaw, ibutaktakmi ti kinadakesmo iti imatang ti sibubukel a pagilian!”

“Iti nagbaetan ti maysa a matangtangad a turayen ken maysa a radikal nga agtutubo a nanghaydiak iti maysa nga eroplano, asino ti patien dagiti tattao? Ti kunam, patiendakayo dagiti tattao  a mangar-aramat iti pammutbuteng tapno matun-oyan ti panggepyo?”

“Ti kinapudno ti patien dagiti umili. Ti kinapudno, uray no leplepam, lumtuadto a manglukais iti kinadakesmo!”

(Adda tuloyna)