Footer

Dios ti agbati, Luzviminda (Maudi a paset) Sarita ni Salvador A. Espejo

“S-saan, didak patayen. Diak pay kayat ti matay! Kaasiandak!” nagpigerger ti timek ni Mayor de la Cuesta.

“Nakariknaka kadi ti kaasi idi papataymo daydi amak?” nangmesmes ni Abel.

Kinugtaran ni Elias ni Mayor de la Cuesta. Nabaliktad daytoy. Sabali pay a kugtar ti nagdisso iti bakrangna.

“Sige, paltogam!” imbilin ni Elias ken ni Abel. “Ipakitata a didata mabalin a butbutngen, a sisasaganata a matay ken pumatay!”

“K-Kaasiannak, dinak patayen!” nagtigerger ti timek ti mayor idinto a nagparintuod iti sanguanan ni Abel.

“Kimat laeng ti saan a mabales, de la Cuesta! Apay a dika dumawat iti pammakawan iti panangibilinmo a mapapatay  daydi amak bareng no maasianak kenka?”

“A-awan ti ammok iti pannakapapatay daydi amam!”

“Natangken ti ulbodmo, de la Cuesta. Saan nga agulbod dagiti saksi a pinagulimekmo tapno makalubam ti kinadangkesmo!”

“Pangngaasiyo, tulongandak!” nagpaarayat ti mayor kadagiti padana a pasahero.

“Annakko, agpanunotkayo,” bimmallaet ni Padre Bernhart. “Diyo koma mansaan ti imayo.”

“Agulimekka!” imbugtak ni Elias iti padi.

Impaturong ni Abel ti paltog iti pispis ti mayor. Immirut ti ramayna iti gatilio.

“Agkararagkan, de la Cuesta! Sige, kararagam itan dagiti amin a didiosem bareng matulongandaka!”

Naganug-og ni Mayor de la Cuesta. “A-Akuek… siak ti nagbilin iti pannakapapatay daydi amam. Dinak koma patayen… Pakawanennak iti naaramidko a babak….”

Nagari ti makatitileng nga ulimek. Iti kamaudianan, naasut iti bibig ni de la Cuesta ti kinapudno!

Tinaliaw ni Abel dagiti  sabali a pasahero, kayatna a penken ti kaririknada iti impudno ni Mayor de la Cuesta. Di panamati? Rimon? Umsi? Dina mailadawan iti rupada no ania ti adda iti nakemda.

Ngem apay a saan a lunod ti mariknana? Apay a saan a maragsakan iti panangako ti mayor iti basolna?

“Ania pay la ti ur-urayem?” intebbag ni Elias. “Kalbitemon ti gatilio!”

Kasla awan ti nangeg ni Abel. Minulenglenganna ketdi ti mayor a kasla ubing itan nga agan-anug-og, langana ti maysa a didiosen a nalabusan iti kinabileg.

“Gudasemon!” nakuna manen ni Elias.

Limmukay ti ramay ni Abel iti gatilio. Inyaprosna ti dakulapna iti agkalkaling-etan a rupana.

“D-diak kabaelan ti pumatay,” nakunana.

“No dimo maitured, siak ti manggudas kenkuana!” inkasa ni Elias ti paltogna.

“Saan!” kinuna ni Abel. “Adu ti nakangeg iti panagpudnona. Ipaimatan iti korte ti….”

Agpatnga koma ni Abel ngem nagallungoganen iti namindua ti paltog. Narikna ni Abel ti napudot a buli a nangarado iti makannigid nga abagana. Naparupanget iti saem a nangapput iti sugatna. Naarinuknok.

Nataliawna ni Mayor de la Cuesta a naidasay iti sikiganna, mangrugin a madigos iti bukodna a dara.

Naparintuod ni Elias. “Diak inggagara,” nakunana.

Pinilit ni Abel ti bumangon ngem napadiwig iti saem.

“Itarayka iti ospital….”

“S-saanen,” inyatipa ni Abel. “Ti kiddawek, sumukotan.”

“Saan!”

“Wen, sumukokayon, Annakko,” kinuna ni Padre Bernhart. “Nangegmi ti panagpudno ni Mayor de la Cuesta. Dakaminto ti agsaksi maikontra kenkuana. Idissoyon ti igamyo. Ammok a saankayo a dakes. Nakullaapan laeng ti panunotyo.”

“Tapno malungsotkami iti pagbaludan, Padre?”

“Patay ti pagtungpalanyo no dikayo sumuko,” kinuna ni Padre Bernhart.

“Natan-ok ti matay a mangiruprupir iti kalintegan!” kinuna ni Elias. “Naitukiten ti bukel. Ad-adunto pay ti tumakder iti masakbayan.”

Naguyek ni Abel. Napakidem iti saem.

Napamulagat idi mariknana ti pisel iti abagana.

“Ditoyen ti pagsinaan ti dalanta, gayyem,” nakuna ni Elias. Timmakder ket agturongen iti ridaw, nakapetpet iti paltog.

“Papanam?” inamad ni Abel.

Saan a simmungbat ni Elias. Linettatna ti ridaw.

Kellaat a nagrisud ken ni  Abel ti panggep ni Elias.

“Saan!” impukkawna ket inkarigatanna ti bumangon.

“Dios laengen ti agbati ken ni Nana Luzviminda,” timmaliaw ni Elias sana intag-ay ti nakamesmes nga imana.

“A-agsublika, Elias!”

Ngem naglumenen ni Elias iti ridaw. Iti apagdarikmat, nagpugso ti paltog iti agdan. Nagbusi dagiti simmungbat nga armas. Naggiikkis dagiti pasahero a kimleb iti tugawda.

“S-saan!” nayikkis ni Abel ket nakagatna ti bibigna. Kellaat a nayurit ti saem, nasasaem ngem iti sugatna.

Naparintuod. Inkarigatanna ti agaludaid nga agturong iti ridaw. Ngem nakapsut unayen. Mangrugin a kumusnaw ti panagkitana.

Iti sikigan ti eroplano, nagulimeken dagiti paltog.#