Footer

Diputado, 3 kakaduana, nasugatan iti pannungpar

BUGALLON, Pangasinan – Nadundunor ti diputado ti maikadua a distrito ditoy a probinsia ken tallo a kakaduana idi nakidinnungpar ti luganda iti maysa a bus ditoy nga ili idi agsapa ti Mayo 5.

Nupay kasta, naireport a nakalasaten iti peggad ni Diputado Leopoldo Bataoil, ti anakna a ni Angela, ken ni PO3 Jim Evangelista.

Naammuan nga adda iti kritikal a kondision ni Ruben Escobar, Jr., drayber ti Nissan Escapade a nagluganan da Bataoil.

Segun iti inisial nga inbestigasion, kagapgapu da Bataoil iti maysa a pasken ket agdaldaliasat ti luganda iti kalsada nasional a sakup ti Barangay Saconi ditoy idi dinungpar ti Dagupan Bus Line a nag-obertek iti maysa a motorsiklo.

Mapapati a napukaw ni Bemmy Cainap, 43, taga-Bagong Silang, Quezon City, ti kontrolna iti manibela idi liniklikanna ti maysa a motorsiklo a puon ti pannakadungparna iti kotse ni Bataoil.

Nagsagrap ni Bataoil ken dagiti kakaduana iti sugat iti ulo ken dadduma a paset ti bagina.

Iti pannakaisurat daytoy, maisagsaganan ti kaso a reckless imprudence resulting to multiple serious physical injuries and damage to property maikontra ken ni Cainap.

Sakbay a nagretiro, nagpaay ni Bataoil a regional director iti PRO1, hepe ti Directorate for Integrated Police Operation (DIPO)-Northern Luzon, director ti National Capital Region Police Office (NCRPO), hepe ti Directorate for Police Community Relations ken kas PNP spokesperson.

Iti eleksion idi 2010, nagkandidato ni Bataoil a para diputado iti maikadua a distrito ket nangabak.#