Direct seeding ti pagay, maitandudo

MAGSINGAL, Ilocos Sur – Nagpinnirma iti maysa a katulagan ti departamento ti agrikultura ken ti gobierno munisipal mainaig iti pannakaitandudo ti direct seeding program kadagiti pagtatalonan ditoy nga ili.

Agdagup iti lima nga ektaria iti Barangay Cabaroan ditoy nga ili ti agpaay a demonstration farm a maraepan iti babaen ti direct seeding, segun ken ni Mayor Arlene Favis.

Kinuna ti mayora a kas sagudayen ti MOA, ited ti DA a libre dagiti kasapulan dagiti mannalon a mairaman iti nasao a programa kas iti ganagan ken irik a mairaep.

Segun iti maysa nga opisial a malaksid a basbassit ti magasto ni mannalon, dakdakkel ti maapitna iti babaen daytoy a programa agsipud ta direkta a maimula dagiti irik, saan a kas iti naipakadawyan a masekkada manipud kadagiti pagbunubonan a pakadangran dagiti ramut dagiti mairaep a pagay.#