Latest News: Director ti DOH-CAR, dismayado iti Abra Provincial Hospital — Tawid News Magazine - Weekly Ilocos News 📰

Director ti DOH-CAR, dismayado iti Abra Provincial Hospital

BAGUIO CITY — Inyebkas ti mangidadaulo iti Department of Health Cordillera Administrative Region ti pannakadismayana iti agtultuloy a saan a panagawat ti Abra Provincial Hospital (APH) kadagiti pasiente a postibo iti Coronavirus disease (COVID-19) iti laksid ti panangipaay ti ahensia iti tulong.

“Siguro, I can understand na hindi  sila prepared [in the first case] but when they had the second case hindi na naman sila nag-admit that was actually the cause of my stress during the past days kasi kawawa ang mga taga-Abra, hindi sila pwedeng ma-admit sa provincial hospital,” kinuna ni DOH-CAR Director Dr. Amelita Pangilinan.

Impalgak ti director daytoy kabayatan iti maysa nga online press briefing idi Marso 31 kalpasan nga imbaga ni DOH Development and Management Officer Dr. Alex Bayubay nga saan nga agaw-awat ti APH kadagiti pasiente nga addaan nakaro a sintomas ken positibo iti COVID-19. Imbingay na nga irasrason ti ospital ti kinakurang ti ramit ken medical workers.

Segun iti DOH-CAR director, ti immuna nga imbaga ti APH a rason iti saanda panangawat iti umuna a kaso ket ti kinakurang iti personal protective equipment (PPEs).

“We were actually [going] to deliver PPEs sana, then the next day sinabi na nila na wala daw health workers. I do not know kung kami ba ang in-charge doon or DILG to call the attention of the LGU,” kinuna.

Kuna ni Pangilinan a nakapagpatangdan kenni Abra Governor Ma. Jocelyn Bernos. Imbingayna a nagkari ti opisial a mangkita iti lugar para kadagiti pasiente a masuspetsa ken addaan COVID-19, ken ti panangsolbarda iti kinakurang dagiti health personnel.

“Siguro we have to give them more time to find a place. They are contemplating a place in La Paz, to make a COVID hospital,” innayonna.

Kabayatanna, impalawag ni Bernos nga awan ti kinapudno ti imbaga ni Bayubay. Segun kenkuana, sursurutenda laeng ti protocol nga inyetnag ti DOH maipapan iti panangtaming kadagiti pasiente ti COVID-19.

“We don’t refuse PUIs even if with severe symptoms. We are just following the algorithm of DOH that confirmed cases should be admitted to Level 2 or 3 hospitals,” kunana.

Segun kenkuana, away pay ti saan nga inawat ti APH a PUI. Innayonna nga segun iti panangtsek-ap dagiti Municipal Health Offices, saan a kasapulan nga agyan iti ospital dagiti nakitada a PUI.

Kunana nga adda dagiti “walk-in PUMs” iti APH, ngem dagiti nakaro ti sintomas na nga PUIs ket mai-refer iti Level 2 nga ospital gapu ta awan ti ventilators ti APH.

Maipalagip nga idi Pebrero, inrakurak ni Dr. Ma. Christina Valera-Cabrera, director ti APH, a nakasaganada para iti posibilidad a maddaan iti pasiente ti COVID-19 iti probinsia. Imbingayna pay dagiti addang nga inaramidda kas ti panangbukel iti Infections Control Committee. Kunana pay a sisasaganada a mangisimpa iti New Outpatient Complex kas isolation area para kadagiti agsakit iti iti COVID-19. Kasta pay nga imbagana nga addaan iti naanay a bilang ti PPE ti ospital.

Ti Abra ti naggapuan ti umuna a kaso ti COVID-19 iti Cordillera. Segun ti naudi a pablaak ti DOH-CAR, addaanen ti probinsia iti tallo a kaso. Kabayatanna, limmaingen ti immuna a pasiente ken pinaawiden ti ospital ngem agtalinaed pay laeng isuna iti strict home quarantine.