Dolphin, naisadsad, napalubosan met laeng

CABUGAO, Ilocos Sur – Maysa a dolphin ti naisadsad iti Barangay Salapasap ditoy nga ili itay nabiit.

Segun ken ni Barangay Ronel Zamora, agatiddog iti agarup lima a pie ti dolphin a naisadsad iti igid ti baybay a sakup ti idauluanna a barangay.

Ubbing dagiti immuna a nakakita iti naisadsad a dolphin idi agarup alas tres ti malem ti Hunio 18 ket  impakaammoda iti barangay kapitan a dagus met a nangipakaammo iti insidente iti beterinario ti ili.

Pinaginana dagiti bumarangay ti dolphin sakbayda a pinalubosan nga impataaw iti agarup alas siete ti rabii.

Kinuna ni Kapitan Zamora nga adda manen dolphin a naisadsad iti lugarda idi Disiembre itay napan a tawen.#