Domogan iti kapolisan: naing-inget nga operasion kontra droga

BAGUIO CITY – Imbilin ni Mayor Mauricio Domogan iti kapolisan ditoy ti ad-adda pay a panagiwayatda kadagiti operasion maikontra iti droga iti sanguanan ti report nga immadu ti bilang dagiti drug-affected barangays iti siudad ditoy.

Iti miting ti City Peace and Order Council a naangay itay nabiit, inreport ti Philippine Drug Enforcement Agency (PDEA) a ngimmato ti bilang dagiti barangay ditoy siudad a naapektaran iti droga iti manipud iti siam idi Pebrero 2013 iti 22 iti daytoy met la a bulan ita a tawen.

Nupay kasta, bimmaba iti 20 ti bilang dagiti drug-affected barangays itay Marso, segun ti PDEA.
Inreport pay ti PDEA a ngimmato met ti bilang dagiti drug personalities iti siudad ket masarakan dagitoy iti Bakakeng Central, Irisan, Military Cut-off, Ambiong, Padre Zamora, Upper Magsaysay, Camp 7, Campo Filipino, Loakan Proper, St. Joseph Village, Bayan Park, Guisad, Salud Midra, Dominican-Mirador, Asin, Middle Quezon Hill, Dontogan, Holy Ghost, Pacdal ken East Quirino Hill.

Kinuna pay ti PDEA a ngimmina ti presio ti shabu ken marihuana ta dagitoy dagiti ad-adda a maaramat a droga iti siudad. Innayon ti PDEA a nagtalinaed ti Baguio City a transhipment iti maiparparit a droga a maipan iti nadumaduma a lugar iti Luzon.

Segun iti PDEA, mailaklako ti marihuana iti manipud iti P50.00 agingga iti P100 kada gramo idinto a manipud iti P6,500.00 agingga iti P7,700.00 kada gramo ti presio ti shabu.

Kanaig daytoy, kinuna ni PDEA Regional Director Ronald Allan Ricardo nga ad-adda pay a pinaingetanda ti kampania maikontra iti droga iti siudad babaen ti panangiwayatda kadagiti buy-bust operations ken panangiserbida kadagiti panagsukisok maikontra kadagiti agilaklako iti droga.

Segun iti PDEA, nangisayangkat ti ahensia, kaduana ti Baguio City Police Office iti 66 nga operasion kontra droga a nakaarestuan ti 75 a tattao ken nakaipilaan iti 77 a kaso maikontra kadagiti naglabsing iti linteg.

Malaksid ti kapolisan, binilin pay ni Domogan dagiti opisial ti Association of Barangay Councils ken ti chairman iti committee on peace and order iti panagipakatda kadagiti gannuat tapno masolbar ti problema iti droga kadagiti nadumaduma a barangay iti siudad.

Kinuna ti mayor a dagiti opisial ti barangay dagiti kangrunaan a kaaliado ti siudad ti Baguio iti pannakirupak maikontra iti panagraira iti illegal a droga.

Imbilin pay ni Domogan iti city legal office iti panangkita daytoy iti pudpudno nga agtagikua iti Shalom House tapno maaramat daytoy a kas rehabilitation center para kadagiti biktima iti droga.

Adda naipasdek a rehabilitation center iti Balenben, Irisan ngem mapapati a di pay nakapasa daytoy kadagiti pagannurotan nga intuding ti Department of Social Welfare and Development ken iti Department of Health.#