Door-to-door cargo truck, nahold-ap

VIGAN CITY – Nagbalin a biktima iti hold-up ti maysa nga empleado ti door-to-door delivery a kompania idi agarup alas 10:45 ti rabii ti Disiembre 22 iti Barangay Ayusan Norte ditoy siudad.

Nainaganan ti biktima a ni Juan de Jesus, 29, baro, residente iti Las Piñas, Rizal, empleado iti kompania nga agideldeliber iti door-to-door a paw-it. Nahold-ap kenkuana ti kuarta a P6,000 ken selponna a Nokia.

Segun iti pulong ti biktima iti polis ditoy, mapanda koma agideliber iti pakete iti kustomerda iti Barangay Ayusan Norte ket agsipud ta dida ammo ti turongenda, insardengda ti cargo truck iti igid ti kalsada ket nagsaludsod iti maysa a lalaki.

Kadua ni de Jesus ti drayber ti kompaniada ken maysa a pahinante idi mapasamak ti hold-ap.

Limmugan ti lalaki tapno ipatuldona ti papananda ngem mapapati a pinaiserrek daytoy ti cargo truck iti maysa a nakipet a kalsada.

Mapapati a dua a lallaki a naglugan iti motorsiklo ti nangsaruno kadakuada ket tinutokan dagitoy ti biktima ken kakaduana saka kinasakas ti kuarta ken selpon ni de Jesus.

Nagpatulong ni de Jesus iti polis ditoy ket nagsawarda ngem saanda a nabirokan dagiti suspetsa.

Iti pannakaisurat daytoy, di pay ammo ti kinasiasino dagiti naghold-ap.#