Footer

Dormitorio a naglabsing iti fire safety code, naballaagan a mapaserra

BAGUIO CITY – Imballaag ti Bureau of Fire Protection ditoy siudad nga irekomendada a  mapaserraan dagiti dormitorio ken dadduma pay a pagkaseraan nga agtultuloy nga aglabsing iti fire safety code.

Daytoy ti imbatad ni Baguio City Fire Senior Supt. Richard Villanueva kalpasan a naduktalanda bayat ti inwayatda nga inspeksion sakbay ti panaglulukat ti klase nga adu kadagiti pagkaseraan ti maibilang a fire hazard.

Nasurok a 200 a dormitorio ken boarding houses ti sinukimat da Villanueva iti routine inspection nga inwayatda sakbay ti panaglukat dagiti klase, kasta met dagiti nadumaduma nga unibersidad ken kolehio ken dagiti publiko nga elementaria ken sekundaria a pagadalan tapno maammuanda no agtungtungpalda met laeng iti Fire Code.

Aganay 90 porsiento kadagiti nasukimat a boarding houses ken apartment iti siudad ti naduktalan nga agkurang kadagiti fire exits, awananda wenno agkurangda iti first aid kits ken ramit a pangdepdep iti apuy, awananda iti emerhensia a silaw ken nakapuy ti kinadalimanekda, ken kaawan ti plano ti pannakaibakuit dagiti agkasera no mangrugin a mauram ti pasdek.

Naduktalan pay iti panagsukimat kadagiti pasdek ti kaadda dagiti fire exits nga agturong iti tuktok, nakakandado a fire exits, kaadda dagiti grills dagiti tawa, kakisang dagiti agdan iti fire escape, nagpaso a pagdepdep iti uram ken tampered a fuses.

Innayon ni Villanueva a dagiti naduktalanda a pagkurangan kadagiti boarding houses ken apartments ket kasta met laeng kadagiti nadumaduma nga unibersidad, pagdagusan, otel ken uray pay dagiti ospital.

Kinuna ti opisial a dagitoy a panaglabsing iti fire safety code ket pagbalinenna dagiti pagkaseraan a firetraps a pakatayan dagiti agkasera no adda rumsua nga uram.

Kinuna ni Villanueva a kasapulan nga iwayat dagiti akinkukua dagiti dormitorio a naduktalan  a naglabsing iti fire safety rules dagiti kasapulan a corrective measures iti konstruksion dagiti istruktura sakbay a maproseso dagiti permitda.

Kinuna ni Villanueva a no saan a korehiren dagiti akinkukua dagiti naduktalan a naglabsinganda, mapilitda a mangirekomenda iti local government unit ti pannakapaserra ti negosio dagitoy tapno maiyadayo dagiti tattao iti pannakaisagmak.#