Dormitorio, natakawan

VIGAN CITY – Maysa a dormitorio ditoy siudad ti natakawan manen idi sardam ti Disiembre 31.

Inreport da Cherry Salvador Ignacio, 24, awanan asawa, ken ni Marites Ignacio Duquinal, 42, naasawaan, agpada a residente iti Barangay Manzante, Magsingal, Ilocos Sur a karaman ti up-upaanda a kuarto kadagiti sinerrek dagiti mannanakaw iti maikadua a kadsaaran ti California Brothers Apartment and Dormitory a masarakan iti Barangay Tamag ditoy siudad.

Nakurimes iti kuarto ti selpon ni Cherry Ignacio nga I phone nga agbalor iti sumurok kumurang P20,000.00 ken maysa a Changhung flat screen TV nga agpateg iti P9,000.00.

Segun iti panagimbestiga dagiti polis, pinanawan dagiti biktima ti kuartoda a nakakandado idi agarup alas 2:00 ti malem ti nadakamat a petsa ket idi naggawid ni Cherry Ignacio iti agarup 5:30 iti dayta met laeng a malem, naduktalanna laengen a napilit a naluktan ti kuartoda ken awanen ti selponna ken TV.

Limtuad iti inbestigasionĀ  a naporsar a naluktan ti ridaw amin a kuarto iti maikadua a kadsaaran.

NakarekobreĀ  dagiti inbestigador iti crime scene iti ID a nakailanadan ti nagan ti maysa a Sonny Jakas T. Crisolo, residente iti Sta. Lucia, Narvacan, Ilocos Sur, dati nga agkaskasera iti nasao nga apartment ken maysa a bareta nga agattidog iti 19 a pulgada a mapapati a pinangdadael kadagiti ridaw.

Iti pannakaisurat daytoy, madama pay ti panagimbestiga dagiti polis no adda pakainaigan ni Crisolo iti pannakatakaw ti dormitorio.#