Dormitorio, natakawan

CERVANTES, Ilocos Sur – Maysa a dormitorio ti naireport a natakawan sadiay Barangay Rosario ditoy nga ili idi bigat ti Disiembre 15.

Nagreport iti polis ni Marcela Avelino y Sebio, 41, naasawaan,    agkaskasera, a naporsar a nadadael ti main door ti tallo a kuarto ti dormitorio a kukua ni William Salvino a masarakan iti Barangay Rosario ditoy met laeng nga ili.

Iti panagimbestiga dagiti polis, naammuan nga awan ti napukaw iti kuarto da Richard Zarate, taga-Mountain Province, ken Marcela Avelino y Sebio, residente iti Barangay Aluling nupay naiwarawara dagiti personal nga aruatenda.

Ngem iti kuarto ni Lenny Galuzo y Bayag-o, 28, awanan asawa, ken residente iti Barangay Comillas North, Cervante, natakaw ti sumurok kumurang P5,000.00 nga assorted coins a naikabil iti plastic jar, 3 portable mini-sound speaker ken 3 back pack.

Madama ti inbestigasion no asino dagiti nagtakaw.#