Double dead a karne, nakumpiska

BAGUIO CITY – Lima a sako naglaon iti “double dead” meat ti kinumpiska dagiti polis ken empleado ti gobierno ti siudad ditoy a mapapati a tinarayan dagiti di pay am-ammo nga aglaklako.

Segun iti report, naduktalan ti maysa a security guard ti Maharlika Livelihood Center dagiti sinako a karne ti baboy a mapattapatta a nasurok a 200 kilos a naabandona iti parking lot daytoy nga establisimiento.

Nupay kasta, awan ti nangtagikua kadagiti nasao a tagilako.

Immuna ngem daytoy, nakakumpiska dagiti polis iti aganay 100 kilos a double dead a karne kadagiti nadumaduma nga stalls iti tiendaan.

Kanaig daytoy, kinuna dagiti opisial ditoy siudad a sansanenda ti agmonitor iti tiendaan tapno malapdan iti pannakaiserrek dagiti double dead meat a mailaok kadagiti presko a karne iti tiendaan.#