BANTAY, Ilocos Sur – Impatalged ni District Engineer Andrelito Tagorda ti 1st Engineering District nga umdas ti pundo ti opisinana agingga iti Disiembre a maaramat a pangtarimaan kadagiti abut-abot a kalsada a pinarnuay ti nagsasaruno a bagyo a nangdalapus iti probinsia.

“Ti maibagak kadagiti tattao, iti kanito nga agsirnaat, agpatchingkami a sigida,” impasingked ni Tagorda.

Nagsagrap ti Department of Public Works and Highways iti umuna a distrito iti probinsia iti pammabalaw manipud kadagiti agbibiahe gapu kadagiti lasonglasong a kalsada.

Adu a paset ti kalsada iti umuna a distrito ti nakurukoran ken nagabut-abot gapu iti pannakalayusda gapu iti sobra a danum nga indateng ti Bagyo Florita, Bagyo Glenda ken ti Bagyo Henry.

Ngem inkalintegan ni Tagorda nga ikagkagumaan ti opisinana ti pannakatarimaan dagiti nadadael a kalsada iti umuna a distrito ti probinsia ngem kapilitan nga agsardengda nga agtrabaho agsipud iti matutudo a tiempo.

Kinunana nga 80 porsiento ti nalpasdan a napatsingan a kalsada idinto nga innayonna a nalpas metten a napatsingan ti paset ti naggabut-abot a kalsada manipud iti Banaoang agingga iti Paing iti ili a Bantay ken iti Rizal Street iti asideg ti Vigan Bakery a kakaruan iti nadadael.

Kinunana a parsial a napatsingan dagiti kalsada a bassit laeng ti dadaelda iti Magsingal, Sto. Domingo ken ti kalsada a mapan iti Sinait agsipud iti kadarato panagtudona.

Kinuna ti inhiniero a saan a temporario ti itaktakkabda kadagiti abut ti kalsada no di cold mix nga aspalto.

Inlawlawag ni Tagorda a para iti matudtudo a tiempo ti cold mix nga uray medio nadam-eg ti mapatsingan nga abut.

“Daydiay ngamin maluto nga aspalto, saan nga advisable nga usaren no nadam-eg ti abut ta saan a kumpet,” kinuna ti district engineer.

“Sapay koma ta maawatan dagiti kakailiantayo nga ar-aramidentayo ti kabaelantayo a mangtarimaan kadagiti nadadael a kalsada,” kinuna ni Tagorda.