Footer

Drayber, naidungparna ti traysikelna, natay

STO. DOMINGO, Ilocos Sur – Gapu iti mapapati a napegges a panagtarayna, dinungpar ti maysa a traysikel ti diding ti maysa a pagadalan a puon ti nakatayan ti nagmaneho idi rabii ti Mayo 21.

Iti inisial nga inbestigasion ti polis, napaspas nga agpalaud a direksion ti traysikel a minaneho ni Edgar Rigos y Doniego, 41, naasawaan ken residente ti Barangay Puro, Magsingal ket idi makadanon iti kurba iti provincial road a sakup ti Barangay Cabaritan ditoy nga ili, napukaw ni Rigos ti kontrolna iti manibela ket dinungsona ti kongkreto a diding ti Cabaritan Elementary School.

Gapu iti pigsa ti pannakaidungparna, nagsagrap ti biktima iti sugat iti ulona a nakatayanna a dagus.#