Drayber, nakadungsa, dinungparna puon ti lomboy

TAGUDIN, Ilocos Sur – Gapu ta nakainom ti drayber, mapapati a nakadungsa daytoy a nagresulta iti pannakadungpar ti minanehona a kotse iti puon ti lumboy sadiay Barangay Tampugo, ditoy nga ili idi parbangon ti Abril 17.

Naideklara nga awanen ti biag ni Mario Asion, naasawaan, iti ospital a nakaitarayanna agraman dagiti nasugatan a pasahero a pakairamanan da Robert James Isnada y Isnada, 5; Eric Isnada y Jolyano, 31; Gerry Isnada y Tongay, 42; Roberto Isnada y Julian, 57 years old; residenteda amin iti Tuding, Itogon, Benguet, ken Eric Marquez y Lorenzo, 31, resident of Alcala, Pangasinan.

Minero amin dagiti nasugatan.

Segun iti report, agturong dagiti biktima iti Daligan, Sta. Cruz, Ilocos Sur a nakalugan iti 4WD VX Toyota Land Cruiser a minaneho ni Asion ngem nagsardengda iti San Fernando City, La Union ket imminomda iti San Miguel Light.

Mapapati nga idi agdaldaliasatda iti national highway a sakup ti Barangay Tampogo, gapu iti nainomna, nakadungsa ni Asion ket nadungparna ti puon ti lumboy.#