BANNER: Drayber natay, 5 nasugatan iti panagdinnungpar dua a traysikel

CABUGAO, Ilocos Sur – Saanen a naiyabot a sibibiag iti ospital ti drayber ti traysikel kalpasan a nakidinnungpar iti sabali pay a traysikel iti national highway a sakup ti Barangay Turod ditoy nga ili idi sardam ti Oktubre 15.

Dead on arrival iti Suero General Hospital ni Reagan Ramos Pacpaco, 31, baro, ken residente iti Barangay Salomague ditoy nga ili gapu iti grabe a dunorna iti ulo kalpasan a nakidinnungpar ti luganna iti Motorstar tricycle a minaneho ni Lawrence Seguban, naasawaan, ken residente iti Sitio Rebba, Barangay Cacadiran, Cabugao.

Nagsagrap met ni Seguban kadagiti dunor iti nadumaduma a paset ti bagina, agraman dagiti pasaherona a pakaibilangan ti asawana a ni Annalyn Seguban y Putulin, 33; dagiti dua nga annakda a da Lance , 6, ken ni Mike, 8; ken ti kaanakanda a ni Anthelyn Seguban y Rabe, 4, ket naitarayda iti Pira Clinic and Hospital.

Iti panagimbestiga dagiti polis, agpadaya a direksion ti Motorstar tricycle a minaneho ni Seguban idi nakasinnabatna ti mapapati a napakaskas ti tarayna nga agpalaud a Honda TMX tricycle a minaneho ni Pacpaco a nagtungpal iti panagdinnungparda.
Nakaro ti dadael dagiti dua a lugan.

Kabayatanna, innem a pasahero a pakaibilangan ti drayber ti nasugatan idi dinungpar ti luganda nga owner-type jeep ti maysa nga Isuzu Elf iti national highway a sakup ti Sitio Rumas, Barangay Suso, Sta. Maria, Ilocos Sur idi malem ti Oktubre 11.
Naitaray iti Judge Guerrero Hospital tapno maagasan ti sugatda da John Paul Abaya y Bilaoen, 29, baro, drayber iti owner-type jeep ken residente iti Brgy San Isidro, Candon City, Ilocos Sur ken dagiti pasaherona a pakaibilangan da Ervin Sofera y Edralin, 22, awanan asawa, residente iti Brgy Bulbulala, Santiago, Ilocos Sur; Alvin Rapanut y Corpuz, 23, awanan asawa; Marvin Oficiar, y Lopez, 18, awanan asawa; Jomar Lopez y Oficiar, 17, residente amin iti Brgy Ulo-Ulo Norte, Santiago, Ilocos Sur ken ni Jerick Monces y David, 23, awanan asawa ken residente iti Brgy Lubong, Sta. Maria.

Saan a naan-ano ti nagmaneho iti Isuzu Elf a ni Martin Ridor y Ritamal, 24, awanan asawa, ken residente iti Barangay Nagtupacan, San Vicente, Ilocos Sur.

Iti panagimbestiga dagiti polis, agpada dagiti dua a lugan nga agpadaya ket idi makagtengda iti nakapasamakan ti aksidente, maysa a behikulo a naggapu iti paggasolinaan ti simrek iti national road a nakaigapuan ti panagmenor ni Ridor ngem dita metten a dinungpar ti sumarsaruno nga owner-type jeep.

Nakaro ti dadael ti sungo ti dyip idinto a nagsagrap met iti dadael iti likud ti Isuzu Elf.##