Drayber, natay iti aksidente ti lugan

CANDON CITY – Natay ti drayber ti maysa a delivery truck idinto a nadunor ti kaduana iti aksidente a napasamak iti national highway ti Barangay Bagani, ditoy siudad idi agsapa ti Oktubre 27.

Agpada a naitaray da Mark Jude Mati Fuerte, 25, residente iti Barangay San Nicolas, Candon City, ken ni Jose Encinas Pardito, 37, residente iti Brgy. Besalan, Santa Cruz, Ilocos Sur, iti Candon City General Hospital ngem saanen a naidanon a sibibiag ti drayber.

Pirmi a nadadael ti Isuzu Elf a nagluganan dagiti dua. Nakuppil met ti makannawan a likud ti dump truck a mapapati a dinungpar ti Elf.

Segun iti report, agpaamianan a direksion ti Isuzu Elf delivery truck a minaneho ni Fuerte, ket mapapati nga obertekanna ti maysa a lugan ngem nagsignal babaen ti flasher ni Jayson Buccat Macanas, nagmaneho iti Mitsubishi Fuso dump truck, a sumrek iti compound ti First Northway Development Construction Corporation ket nadungpar ti Elf ti kutit ti dump truck a puon ti nakaipitan ti drayber iti tugawna.

Inakkal dagiti nagresponde a kameng ti Bureau of Fire Protection ni Fuerte sada intaray iti Candon City Hospital ngem naideklara daytoy a dead on arrival.#