Drayber nga akusado panaglabsing RA 10591, naaresto

CANDON CITY – Inaresto dagiti polis ditoy ti maysa a drayber nga akusado iti panaglabsing iti RA 10591 sadiay Barangay San Juan ditoy siudad idi agsapa ti Septiembre 15.

Naaresto ni Roger Annaguey Mangay-ayam, 48, naasawaan, residente iti Barangay Sto. Tomas, Candon City, ken akusado iti panaglabsing iti RA 10591 babaen ti bileg ti warrant of arrest nga inyisio ni Judge Gina Juan-Chan, presiding judge ti Regional Trial Court, Branch 23, Candon City.

Naka-docket ti kaso ni Mangay-ayam iti babaen ti Criminal Case No. 3845-C ket nairekomenda nga agpiansa iti P120,000.00 para iti temporario a wayawayana.

Nagresponde dagiti polis kalpasan a nakaawatda iti tip manipud iti maysa a BIN/EB/Lambat Sibat Volunteer a nakitana ti akusado iti Barangay San Juan a nagresulta iti pannakaresto ni Mangay-ayam.

Naipan ti akusado iti Candon police station para iti dokumentasion ken umisu a disposision.#