Drayber ti bus a nainbolbar iti aksidente, nakasuan

VIGAN CITY – Napilaan iti kaso ti drayber ti bus a nainbolbar iti aksidente ditoy siudadĀ  a nakatayan ti maysa a motorista ken nakadunoran ti kinasakayna idi agsapa ti Hulio 7.

Nasaklangan iti kaso a reckless imprudence resulting to homicide, serious physical injury and damage to property iti City Prosecutorā€™s Office ni Sandy Garcia y Diaz, 34, naasawaan, drayber ti Partas Bus ken residente itiĀ  1851 Calamba Street, Corner Antipolo, Sampaloc, Manila gapu iti pannakatay ni Christopher Gallicia y Recel, 28, baro, ken iti pannakadundunor ni Roldan Rebuldela y Rosales, 28, naasawaan, agpada a residente iti Barangay Cabaroan, Sta. Catalina, Ilocos Sur.

Segun iti inisial a panagimbestiga dagiti polis, bayat ti panagdaliasat nga agpalaud a direksion iti Burgos Street ti Euro motorcycle a minaneho ni Gallicia, kalubbonna ni Rebuldela, idi agarup 1:10 ti agsapa ti Hulio 7, aksidente a nasapgid ti naggapu iti abagatan nga agpaamianan a Partas bus a minaneho ni Garcia iti nagsulian ti Rizal Street ken Burgos Street, Barangay III, ditoy siudad.

Kas resulta, nagsagrap dagiti biktima kadagiti nakaro a dunor iti nadumaduma a paset ti bagida ket naitarayda iti Saint James Hospital ngem indeklara ti doktor ni Gallicia nga awanen ti biagna.

Awan ti puot ni Rebuldela a naidanon iti ospital ket madama a maob-obserba ti kasasaadna.

Kabayatanna, napaay a naglibas ti nagmaneho iti kotse a nakasapgid iti motorsiklo a nagluganan ti dua a baro sadiay Govantes Dike, Bantay, Ilocos Sur idi rabii ti Hulio 6 gapu ta naipiskot dagiti polis babaen ti tulong ti maysa a motorista.

Natiliw dagiti nagresponde a barangay tanod ti drayber ti Honda Civic a maysa a Kevin Allen Magpali y Arde, 24, baro, ken residente iti Barangay Bacsil, San Juan, Ilocos Sur, iti sanguanan ti STI building iti igid ti national highway a sakup ti Barangay Boquig, Bantay kalpasan a pinanggep ni Magpali a tarayan dagiti nasapgidna.

Iti panagimbestiga dagiti polis, agpaamianan ti Racal motorcycle a minaneho ni Ryan Angelo Abing y Aglusulos, 18, baro, ken residente iti Barangay Balbalasioan, Sta. Maria, Ilocos Sur, ken nakilubbonan ni Michael Angelo Vivit y Rabara, 20, baro, ken residente iti Barangay Sulot-sulot, San Juan, Ilocos Sur, idinto a sarsarunuen ti kotse a minaneho ni Magpali ket idi makadanonda iti Govantes Dike, aksidente a nasapgid ti napardas ti tarayna a kotse ti likud ti motorsiklo.

Kas resulta, naikras ti motorsiklo agraman dagiti naglugan a nagsagrapanda kadagiti dunor iti nadumaduma a paset ti bagida.

Naglibas ti suspek iti laud a direksion ngem maysa nga Ahmed Sirdanen y Catacutan, taga-Barangay Bayubay Sur, San Vicente, Ilocos Sur ti nangkamat iti kotse agingga iti nagsardeng daytoy iti sango ti STI gapu ta nabtak ti akin-kannigid a pilidna.

Dagus a nagpatulong ni Sirdanen kadagiti barangay tanod iti Zone 5, Bantay ket naipiskotda ti suspek.

Naipan dagiti biktima iti Gabriela Silang General Hospital para iti pannakataming dagiti sugatda idinto a naipababaen iti medico legal examination ti suspek.

Segun iti polis, nakainom ti suspek idi mapasamak ti aksidente ken nagpason ti lisensiana.#