Drayber ti bus, nakoriente, natay

SANTIAGO, Ilocos Sur – Naideklara nga awanen ti biag ti maysa a driver ti bus iti rural health unit a nakaitarayanna gapu iti pannakakorientena iti paraanganda sadiay Barangay Dirdirig ditoy nga ili idi malem ti Mayo 22.

Naideklara a dead on arrival ni Raymund Peralta y Bello, 34, natibo iti Barangay Al-aludig ngem aggigian iti Barangay Dirdirig bayat ti pannakatamingna iti RHU babaen ken ni Dr. Edgar Rante.

Intaray dagiti kaarrubana ti biktima idi nakitada a nakadalutaytay iti daga ngem saan a nakalasat daytoy iti pannakorientena.

Naammuan iti inisial nga inbestigasion dagiti polis a rimmuar a sakasaka manipud iti balayna ti biktima idi agarup alas 12:00 ti aldaw ti nadakamat a petsa ket adda pinidutna a kayo ngem mapapati a nakaiggem iti nakulislisan a barut a puon ti nakakorienteanna.#