Drayber ti bus natay, 6 nasugsugatan iti aksidente

TUBA, Benguet – Maysa a ti natay idinto a nasugatan ti innem itay nabiit idi saan a nakontrol ti drayber ti lugan a puon ti pannakaidungparna iti bakras ti bantay iti Marcos Highway a sakup daytoy nga ili.

Natay ni Jose Emmanuel Rojas, drayber ti bus ti Bicol University iti Legaspi City, idinto a naitaray dagiti innem a pasahero a pakairamanan ti asawana iti Baguio General Hospital and Medical Center gapu kadagiti sugat a sinagrapda.

Segun iti polis ditoy, agdaldaliasat ti bus iti Marcos Highway, sakbay ti Barangay Bontiway ditoy nga agpa-Manila iti 8:40 iti bigat ti Disiembre 23 idi napukaw ti kontrol ni Rojas iti manibela a puon ti nakaidungparan ti bus iti bakras ti bantay.

Kagapgapu dagiti 42 a naglugan a mangisursuro ken estudiante iti dua-aldaw a seminar a naangay iti Benguet State University iti La Trinidad.

Innala ti Department of Social Welfare and Development iti aywanda ni April, 4, anak ni Rojas bayat ti pannakataming ti asawana iti BGHMC.

Iti pannakaisurat daytoy, di pay ammo no ania ti kagagapu ti aksidente.#