Drayber, tinarayanna nakadinnungparna

SAN JUAN, Ilocos Sur – Tinarayan ti drayber ti Isuzu Elf dagiti nakadinnungparna a naglugan iti motorsiklo a nagresulta iti saanen a pannakaidanon ti maysa a sibibiag iti ospital.

Iti report manipud iti polis ditoy, agpada nga agpaabagatan a direksion ti motorsiklo a minaneho ni Rey John Paul Tenorio y Alviar, 14, a nakisakayan da Arvin Ancheta y Serrano, 13, ken JR Guzman y Pre, 12, agpapada a residente iti Barangay Lapting, ditoy nga ili, ken ti Isuzu Elf a di pay nabigbig ti nagmaneho, ket iti Barangay Bannuar, San Juan, nagpakannigid ti Elf idinto nga agobertek met ti motorsiklo a nakagapu iti panagdinnungparda ken nakaikrasan ti motorsiklo.

Nagsagrap dagiti naglugan iti motorsiklo iti dunor kadagiti nadumaduma a paset ti bagida ket naitarayda iti Pira Clinic and Hospital ngem naideklara ni Guzman a dead on arrival.

Naglibas ti di nabigbig a nagmaneho iti Isuzu Elf kalpasan ti pannungpar.#