Dredging iti Burnham Lake, naipanamnama a malpas 30 aldaw

BAGUIO CITY – Malpas ti dredging operations iti Burnham Park iti las-ud ti makabulan, daytoy ti impanamnama ti kontractor ken ni Mayor Mauricio Domogan itay nabiit.

Sakbayna, kinapatang ni Domogan dagiti kontraktor dagiti nadumaduma a proyekto ti Department of Public Works and Highways tapno maipasiguradoda a maikamakam a maileppas amin dagiti proyekto iti panangrambak daytoy a siudad iti Panagbenga Festival.

Kinuna ni Domogan a no saan a maileppas dagiti proyekto iti maudi a lawas ti Pebrero, irekomendana a maituloy laengen dagitoy kalpasan ti parambak tapno saan dagitoy a pagtaudan dagiti problema ti trapiko kadagiti turista a manamnama a sumang-at iti Baguio tapno agbuyada iti Panagbenga Festival, tinawen a parambak dagiti sabong iti siudad.

Mainaig iti pannakakali ti Burnham Park, naituding a malpas koma daytoy iti 90 nga aldaw.

Ti Burnham Park ti maysa a paborito nga ayuyang dagiti turista, nangruna iti panagbangkada iti dan-aw. Ngem iti panaglabas dagiti tawen, rimmabawen ti dan-aw gapu kadagiti rugit ken pitak agsipud ta ditoy ti pagurnongan ti danum manipud iti tudo ket ti pannakakalina ken pannakadalusna ti panggep ti agpateg iti P20.8 million a proyekto ti DPWH, malaksid laeng ti pannakakongkreto ken pannakapapigsa ti sementado a perimeter ti dan-aw.

Kinuna ti mayor a no malpas ti dredging project ti Burnham lake, mapasubli ti operasion ti fountain iti tengnga ti dan-aw a manamnama a mangawis iti ad-adu pay a turista nga agpallailang iti parke.

Nupay kasta, agam-amak dagiti agpapaupa iti bangka a mapukawanda iti pagbiagan no malpas ti pannakakali ti dan-aw agsipud ta mapuruakan daytoy iti Japanese koi ken tilapia.#