Dredging vessel, napaputokan

CAOAYAN, Ilocos Sur – Saan pay nga ammo ti kinaasino dagiti nangpaltog iti dredging vessel sadiay Barangay Villamar, ditoy nga ili idi Mayo 7.

Iti report ni Vice Mayor Pedro Belarmino iti police station ditoy, pinaputokan dagiti di pay am-ammo a tattao ti nasao a dredging vessel a naisanglad iti sumurok-kumurang 150 metro manipud iti baybay ti Barangay Villamar.

Segun ken ni Feng Chao Qing, 40, naasawaan, Chinese national nga operator ti dredging vessel a nagmarka iti Hercules 888, naduktalanna a naburak ti akinlikud a windshield ti control room ti nasao a dredging vessel iti nagbaetan ti alas 8:00 ken 9:00 ti rabii ti Mayo 6.

Kinuna ni Qing, nakadiskobreda iti slug a mapapati a naggapu iti cal. 45 iti suelo ti control room iti dayta met la a petsa.#