Drinking session dagiti agkakabsat, nagtungpal iti pammagsol

GALIMUYOD, Ilocos Sur – Dati a susik ti mapapati a puon ti nangbagsolan ti maysa a mannalon iti kabsatna.

Binagsol ni Sammy Duga y Real, 39, naasawaan, ken residente iti Barangay Legaspi, ditoy nga ili, ti kabsatna a ni Judy Duga y Real, 41, naasawaan, mannalon, ken agnaed met laeng iti nadakamat a barangay idi agarup alas 11:45 ti Septiembre 24.

Sakbay ti insidente, naggiinom dagiti dua, karaman ti sabali pay a kabsatda, ni Manuel Duga iti balay ti biktima.

Idi naibbusda ti botelia ti gin, naggawid ni Manuel a sinaruno ti suspek. Ngem kalpasan ti sumagmamano a minutos, mapapati a nagsubli ti suspek ket binagsolna ti manongna a nakatamaan ti makannigid nga abaga daytoy.

Naitaray ti biktima iti Candon City General Hospital idinto a naglibas ti suspek.#