Drinking session, nagtungpal iti pammagsol, pannagbat

BANTAY, Ilocos Sur – Dua a lalaki ti natay iti nagsina a pammagsol ken pannagbat iti Sta. Cruz ken daytoy nga ili a nagramut iti saan a panagkikinnaawatan gapu iti pannakakainomda iti arak idi malem ti Septiembre 11.

Iti report a dimmanon iti provincial police office ditoy, natay gapu iti pannakabagsolda da Rogelio Cortez y Gerdan, 37, baro, ken residente iti Barangay Villa Gracia, Sta. Cruz, Ilocos Sur ken Moises Bolin y Alvares, 44, awanan panggedan, ken residente iti Barangay Pagangpang, Galimuyod, Ilocos Sur.

Iti report manipud iti Sta. Cruz police station, sakbay ti pammagsol naggiinom da Cortez ken ni Jerry Geronimo y Bayeng, 37, naasawaan, kayong ti biktima ken residente met laeng iti nadakamat a lugar  iti balay ti biktima ngem adda naparnuay a dida panagkinnaawatan a nagtungpal iti nabara nga argumentoda ket binato ti biktima iti botelia ti serbesa ti suspek a nakapuntaan ti muging ti naud-udi.

Pinidut ti suspek ti maysa a bolo ket tinagtagbatnan ti biktima iti sumagmamano a daras a nakasugatan ti nadumaduma a paset ti bagi daytoy.

Intaray dagiti nagresponde a polis ti biktima iti Sta. Lucia District Hospital ngem indeklara ti doktor a nangtaming kenkuana nga awanen ti biagna.

Intaray met ni Eusebio Rafanan, chief tanod, ti suspek iti Southern Ilocos Sur District Hospital iti Barangay Bio, Tagudin para iti pannakaagas ti nadunor a mugingna sa kalpasanna, impaimana ti suspek iti polis, agraman ti bolo a naaramat iti pannagbat nga agatiddog iti sumurok-kumurang 21 pulgada.

Kabayatanna, nainaganan ti bimmagsol ken ni Bolin a ni Reynaldo Del-is Rafael, 55, naasawaan, mannalon ken kalugaran met laeng ti biktima.

Segun iti report, naggiinom ti biktima, suspek ken dadduma pay a kakaduada iti balay ni Teddy Talladen a nagkasangay iti dayta nga aldaw ket iti kangitingitan ti panaggiinomda, inakusaran ti biktima ti suspek a nangkugtar kenkuana ngem pinaglibakan ti naud-udi.

Pinagkalma ida ni Barangay Kagawad Nathaniel Wangit ket kalpasanna mapapati a pimmanawen dagiti dua.

Ngem kalpasan ti sumagmamano a darikmat, adda nagkaribuso iti ruar ket nasarakanda laengen ti biktima nga awanen ti biagna.

Tinengngel ti kagawad ni Del-is sana impaima daytoy kadagiti nagresponde a polis agraman ti imuko a sumurok-kumurang sangapulo ket kagudua a pulgada ti kaatiddogna.#