Drinking spree, nagtungpal iti pammagsol

STA. MARIA, Ilocos Sur – Natay ti maysa a mannalon iti pammagsol bayat ti drinking spree sadiay Barangay Baballasioan ditoy nga ili idi malem ti Hunio 19.

Natay iti pammagsol ni Arnoldo Cabalo y Cabuag, 62, naasawaan, mannalon, ken residente iti nadakamat a barangay idinto a ti kaanakan ti biktima a ni Fredie Cabalo y Cabuag, 34, ti nainaganan a nangbagsol iti lakay.

Segun iti panagimbestiga dagiti polis, naggiinom ti suspek, biktima ken dua pay a di nainaganan a kakaduada iti paraangan ni Jerry Serrano ket nagsubang dagiti dua.

Mapapati a pinang-or ti biktima ti ulo ti suspek ket bimmales ti suspek babaen ti panangbagsolna iti ulitegna iti sumagmamano a daras iti likud daytoy a nakaigapuan ti pannakatayna.

Boluntario a simmuko ti suspek iti polis ken addan iti ikut dagitoy ti imuko a naaramat iti pammagsol.#