Droga, granada, nasukalan iti ikut masuspetsa a drug pusher

SINAIT, Ilocos Sur – Makalawas kalpasan iti naballigi a drug operation ngan insayangkat ti nagtitipon nga elemento ti kapolisan ditoy nga ili a nakatiliwan ti 13 a tattao ken nakasamsamanda kadagiti mapapati a shabu, paltog ken balbala, ken drug paraphernalia, nakasukain manen dagiti polis iti droga ken eksplosibo iti ikut ti maysa a suspek nga aglaklako iti droga idi parbangon ti Disiembre 18.

Iti pannakaisurat daytoy, maisagsaganan ti kaso ti panaglabsing iti RA 9165 ken RA 9516 maikontra ken ni Mark Louie Giron y Aurelio, 21, b aro, mannalon, ken residente iti Barangay Macabiag, ditoy nga ili.

Maipalagip nga idi agarup 1:00 ti bigat ti Disiembre 18, bayat ti panagpatrolia dagiti polis, nakitada ti maysa a TMX motorcycle a nagluganan ti dua a lalaki a nagsardeng iti sanguanan ti Durong’s Malunggay Pandesal ket dimsaag ti naglugan iti likud a nabigbig idi agangay a ni Giron.

Idi nasiputan ti drayber ti motorsiklo dagiti polis, pinataraynan ti motorsiklona ket nabati ni Giron.

Pinadas ni Giron ti naglibas idi asitgan dagiti nagsuspetsa a polis ngem saan a nakalusot.

Bayat ti panangtengngel dagiti polis iti suspek, nasiputanda ti maysa nga aluminum foil a natinnag manipud iti box nga ig-iggamanna.

Gapu itoy, sinukimat dagiti polis ti box ket naduktalanda a naglaon daytoy iti maysa a hand grenade apple type, plastic sachet nga addaan iti mapapati a shabu residue, plastic sachet a nagtagisiper a naglaon iti sabali a plastic sachet a nagkarga iti masuspetsa a shabu, ken drug paraphernalia a pakaibilangan ti dua nga improvised straw scoop, disposable lighter, ken medisina.

Daytoy ti maikadua a gundaway a nakasamsam dagiti otoridad iti armas iti ikut dagiti aglaklako iti droga.

Iti buy bust operation nga inwayatda iti Brgy. Ricudo, Sinait, Ilocos Sur idi alas 12:00 ti malem ti Disiembre 12, sangapulo ket tallo a tattao ti inaresto dagiti nagtitipon nga elemento a pakaibilangan ti Sinait Police Station, PIB, ISPAIDSOTG, PDEA ISSET, PIDMB, ISPPSC, RPSB-1, RIO-1 ken Cabugao Police Station.

Nainaganan dagiti natiliw a da James Tagatac y Bernal, 22, residente iti Brgy. Nagbalioartian, Sinait, Ilocos Sur; Noel Ipac y Fiesta, 27, residente iti Brgy. Nagbalioartian, Sinait, Ilocos Sur; Mark Louie Quitoriano y Ibañez, residente iti Namnama, Sinait, Ilocos Sur; Jack Ines y Ines, residente iti Pug-os, Sinait, Ilocos Sur; Efren Cayyong y Apongol, 18, residente iti Katipunan, Sinait, Ilocos Sur; Alfredo Yadao y Martinez, 40, single, residente iti Teppeng, Sinait, Ilocos Sur; Alphie Ingan y Yagyagan, 24, residente iti Namnama, Sinait, Ilocos Sur; Jigz Macugay y Bautista, 23, married, residente iti Binacud, Sinait, Ilocos Sur; Felipe Agdeppa y Bayuga, 73, residente iti Ricudo, Sinait, Ilocos Sur; Cris Ilmeng y Yacas, 20, residente iti Ballaigui, Sinait, Ilocos Sur; Eugene Tagudar y Matia-ong, 37, residente iti Calay-ab, Sto Domingo, Ilocos Sur; John Mark Islaw y Rafanan, 17, residente iti Paratong, Sinait, Ilocos Sur ken Louie Marc Agdeppa, 16, residente iti Ricudo, Sinait, Ilocos Sur.

Nakasamsam dagiti polis iti ikut dagiti suspek kadagiti sumaganad: 15 heat sealed transparent plastic sachet a nagkarga iti mapapati a shabu; 9 awan kargana a plastic sachet; improvised tooter; improvised sealer; disposable lighter; improvised scoop; digital weighing scale; pouch color brown; stainless scissor ken hair puller (tiani).

Nakakumpiska pay dagiti polis iti maysa a cal. 38 iti ikut ni Felipe Agdeppa, 25 a bala para iti cal. 38; 4 bala para iti gauge 12; ken P1,000.00.#