Droga, nakumpiska dagiti polis iti inwayatda a panagsukisok iti 2 balay

STA. MARIA, Ilocos Sur – Dua a pagtaengan ti sinukisok dagiti nagtitipon nga elemento ti polis idi malem ti Marso 19 ket nakakumpiskada kadagiti sachet a mapapati a naglaon iti maiparparit a droga.

Imet dagiti police elements a pakaibilangan ti PAIDSOTG, ISURPPO, Philippine Drug Enforcement Agency (PDEA) ken polis Sta. Maria iti panangidaulo ni PCInsp. Sosimo Racho, chief PAIDSOTG, PSInsp. Andrew Rabang, OIC COP, ken PInsp. Alejandro Manzano, DCOP ditoy nga ili ken iti superbision ni Police Senior Supt. Noel B. Amoyen, DSC, ken iti koordinasion ti PDEA RO1 ti search warrants nga inyisio ni Judge Sixto D. Diompoc ti RTC Branch 72, Narvacan, Ilocos Sur a napan nagsukisok iti balay ni Cornelio Garcia y Dalit, 49, balo, drayber ken residente iti Barangay Poblacion Sur, Sta. Maria, Ilocos Sur; Diana Dasalla y Garcia, 29, balasang ken Wilmar Dasalla y Garcia, 28, baro, agpada a residente iti Barangay Baliw Laud, Sta. Maria, Ilocos Sur.

Nakakumpiska dagiti polis iti balay ni Garcia iti lima a babassit a heat sealed plastic sachet a naglaon iti mapapati a shabu nga agdagsen iti .6 gramo a mapattapatta nga agbalor iti P7,080.00; maysa a disposable lighter; maysa a bala para iti M16 (5.56mm); maysa a Nokia cellphone; ken P565.00.

Nakasukain met dagiti polis iti balay dagiti dua a Dasalla iti 13 a heat sealed plastic sachet a naglaon iti mapapati a shabu nga agdagsen iti .9 nga agbalor iti agarup P10,620.00; maysa a plastic sachet (container); ken maysa a bassit a brown a petaka nga addaan iti siper.

Sinaksian dagiti barangay officials ken ni Marlon Dennis Peria, empleado ti MCTC, ti panagsukisok dagiti polis.

Naipan dagiti naaresto iti Central Ilocos Sur District Hospital, Narvacan, Ilocos Sur para iti medico-legal examination idinto a naisubmite iti Regional Crime Laboratory Office 1, Camp Brig Gen Oscar M Florendo, Parian, San Fernando City, La Union dagiti nakumpiska iti panagsukisok para iti pannakaamirisda.#