Droga nakumpiska iti balay ti barangay kagawad

NARVACAN, Ilocos Sur – Droga ken drug paraphernalia ti nakumpiska dagiti nagtitipon nga operatiba bayat ti search operation nga insayangkatda iti balay ti maysa nga opisial ti barangay sadiay Barangay San Jose ditoy nga ili idi malem ti Agosto 14.

Nakakumpiska dagiti nagtitipon nga elemento ti Narvacan Police Station, PDEA, CIDG Ilocos Sur ken PAIDSOTG Ilocos Sur iti balay ni Ronald Roland Velasco, 47, barangay kagawad, iti dua a plastic sachet naglaon iti mapapati a shabu; 3 lighter; water pipe nga addaan iti mapapati a residue ti shabu; getteng; 2 improvised tooter nga addaan shabu residue; maysa nga straw scoop ken dagum.

Sinaksian dagiti barangay officials nga indauluan ni Barangay Captain Melecio Viloria, Kagawad Jonathan Valenciano, ken kamkameng ti media manipud iti ABS-CBN ken DZTP ti panagsukisok iti balay ni Velasco.

Inimbentario ken minarkaan ti kapolisan dagiti nakumpiskada iti mismo a lugar a nangisayangkatanda iti panagsukisok, kasta met iti sertipikasion a naiwayat ti panagsukisok iti natalna a wagas.

Naikustodia ni Velasco ti police station idinto a maisagsagana ti pannakaipila ti kaso maikontra kenkuana.

Kabayatanna, idi agarup 3:20 ti malem ti Agosto 9, balligi ti buy-bust operation ti kapolisan ken pannakasukisok ti balay ni Herbert Hagad y Toquero, 44, naasawaan, singer ken residente Barangay Sabuanan, Sta. Lucia, Ilocos Sur.

Sinaksian dagiti barangay officials ken kamkameng ti media ti panagsukisok iti balay ni Hagad nga insayangkat ti nagtitipon nga elemento ti Sta. Lucia PNP nga indauluan ni OIC PCI Jason Tejero Nadarisay, PDEA Region 1 nga indauluan ni IA5 Melvin Estoque ken personnel ti ISPPSC.

Nakumpiska iti balay ni Hagad ti dua a sag-P500.00 a peke a kuarta nga addaan PL 507671 ken PL 507671; 2 plastic sachet a naglaon iti mapapati a marihuana; nalukot a foil; maysa tooter; improvised water pipe; stainless a getteng; 5 lighter; maysa a pakete ti transparent plastic; maysa a plastic canister a naglaon iti 8 nga improvised needle; maysa a pakete ti heat sealed plastic sachet a naglaon iti mapapati a shabu; 3 narolio nga aluminum foil; 2 plastic sachet a naglaon iti mapapati a residue ti shabu; 2 improvised straw ken stainless scope a maus-usar para repacking iti shabu; dua bala ti cal. 45; 3 bala ti cal. 38; 35 a bala ti cal. 22; plastic sealer; maysa a bala ti gauge 12; nangisit a pouch; ken plastic sachet a naglaon iti mapapati a nagango a bulong ti marihuana.

Impan dagiti operatiba ti PDEA dagiti nakumpiska iti San Fernando City, La Union.
Napilaan metten ti suspek iti kaso a panaglabsing iti RA 9165 ken RA 10591 iti prosecutor’s office, Candon City, Ilocos Sur.#