Droga nakumpiska iti search operation, barangay kapitan, 2 pay kaduana, naaresto

MAGSINGAL, Ilocos Sur – Tallo a tattao a pakaibilangan ti maysa a barangay captain ti inaresto dagiti operatiba kalpasan a nagpositibo ti insayangkatda a search operation iti pagtaengan ti nasao nga opisial sadiay Barangay San Julian ditoy nga ili idi Hulio 1.

Inaresto dagiti operatiba ti PIB ken PDEA nga indauluan ni I03 Darnel L. Bacate, PAIDSOTG nga indauluan ni PCI Sosimo Racho, ken police station ditoy nga ili nga indauluan ni PSI Jaime Laguesma da Barangay Captain Nino Noel Tolentino y Udarbe, 31, naasawaan, ken residente iti Barangay San Julian; Robert Tamayo y Verazon, 45, naasawaan;Ā  laborer ken residente itiĀ  Brgy. San Julian, Magsingal, Ilocos Sur; ken Thaddeus Villalon y Salvador, 43, baro, karpintero ken residente iti Brgy. San Basilio, Magsingal kalpasan a nagpositibo ti search operation nga inwayatda iti pagtaengan ti nasao nga opisial idi agarup alas tres ti malem ti Hulio 1.

Nairaman da Tamayo ken Villalon a naaresto gapu ta naranaan dagiti polis dagitoy iti uneg ti balay ni Tolentino idi insayangkatda ti operasion.

Nakakumpiska dagiti polis iti pagtaengan ni Tolentino iti maysa a pakete ti plastic sachetĀ  a mapapati a naglaon iti shabu; 7 a babassit a plastic sachet a naglaon iti mapapati a shabu; substansia a mapapati a shabu; digital weighing scale; maysa a cartridge/glass tube (lidocaine HCI Epinephrine); improvised tooter nga addaan mapapati a shabu residue; 5 a lighter; 17 a nalukotlukot nga aluminum foil a mapapati nga addaan shabu residue; 8 improvised tooter aluminum foil nga adda mapapati a shabu residue; lima a heat sealed a nagawangan a plastic sachet nga addaan mapapati a shabu; narolio nga aluminum foil; 3 pakete ti plastic sachet a mausar para repacking; 3 a Samsung cellphone; ken maysa a tablet nga Amazed.

Inimatangan dagiti barangay officials, kameng ti media kenĀ  pannakabagi ti DoJ ti panagsukisok.

Naipan dagiti suspek iti police station para iti umisu a disposision idinto a naidatag dagiti drug paraphernalia ken plastic sachets iti Crime Laboratory Office, Camp Valentine S. Juan, Laoag City, Ilocos Norte para iti pannakaamirisda.

Iti kaudian a report, naiyendorson iti Opisina ti Provincial Prosecutor ti kaso a panaglabsing iti RA 9165 maikontra kada Tolentino, Tamayo, ken Villalon.

Kabayatanna, inaresto dagiti nagtipon nga elemento ti Santa police station ken ti PAIDSOTG ken babaen ti koordinasion ti PDEA ti maysa a drug pusher babaen iti buy bust operation nga insayangkatda a mismo iti tiendaan publiko ti nasao nga ili.

Naaresto ni Edwin Borje y Galinato, 48, naasawaan, ken residente iti Barangay Sacuyya Sur, Santa kalpasan a nakumpiska iti ikutna ti 4 a heat sealed plastic sachet a naglaon iti mapapati a shabu; ken maysa a heat sealed sachet nga inlakona iti maysa a poseur-buyer ken marked money a sag-P500.00.

Nakumpiska pay iti ikut ni Borje ti maysa a selpon ken P14,000.00 iti nadumaduma a denominasion a mapapati a naglakuan ti suspek.

Naipan ti suspek iti police station para iti dokumentasion ken dagiti nakumpiska kenkuana para iti laboratory examination.#