Drug case, naipila maikontra hair stylist

SANTA, Ilocos Sur – Naipaiman iti opisina ti provincial prosecutor, Vigan City ti kaso a panaglabsing iti Section 5 iti R.A. 9165 maikontra iti maysa a hair stylist iti baet a saan a pinirmaan ti barangay captain ti resibo ti inbentario dagiti mapapati a nakumpiska iti drug buy bust operation maikontra iti suspek.

Kas maibatay iti report, saan a kinayat ni Marcos District Barangay Captain Arthur Sabalburo a pirmaan ti inventory receipt dagiti nasamsam ken ni Marvin Dumlao y Tubera, 34, single, hair stylist, ken residente iti Barangay Labut Norte, Santa, Ilocos Sur nupay mapapati a presente idi naaramid ti inbentario, kasta met a sisasango ti suspek ken iti inana.

Saan a nailanad iti report no apay a saan a kinayat ni Sabalburo a pirmaan ti inventory receipt.

Sakbayna, inwayat dagiti nagtitipon nga elemento ti kapolisan a pakaibilangan ti Santa police station, ISPAIDSOTG, PDEA Team Bravo-Ilocos Sur babaen ti koordinasion ti Philippine Drug Enforcement Agency- Regional Office 1 ti buy bust operation idi agarup 7:00 ti rabii ti nadakamat a petsa sadiay Barangay Marcos District a nagresulta iti pannakatiliw ni Dumlao.

Nakakumpiska dagiti polis manipud ken ni Dumlao ti P500.00 a marked money a naaramat iti buy bust operation ken maysa a plastic sachet a naglaon iti masuspetsa a shabu a mapapati a ginatang ti police asset bayat ti drug operation iti imatang ni PO1 Elmer Queddeng a dagus a nangtawag iti hepe ti polis.

Mapapati nga adda komosion a napasamak idi nadlawan ni Dumlao iti kaadda ti police officer.

Pinagtalna dagiti nagresponde a polis ti suspek.

Naaramid ti pannakainbentario, pannakamarka ken pannakaretrato dagiti nakumpiska ken ni Dumlao iti sanguanan ti suspek, ti inana ken ni Barangay Captain Arthur Sabalburo ngem mapapati a saan a pinirmaan ni Sabalburo ti nasao nga inventory receipt.

Iti laksid daytoy, naipan ti suspek ken dagiti nakumpiska kenkuana iti police station para iti umisu a dokumentasion.

Naisubmite met iti PNP Crime Laboratory Office, Bulag, Bantay, Ilocos Sur ti plastic sachet a nagkarga iti mapapati a shabu para iti pannakaamirisna, kasta met a naipababaen ti suspek iti drug testing.#