Drug personality a natiliw bayat pot session, nanayonan kasona

CANDON CITY – Nakaeskor manen dagiti polis ditoy siudad iti kampaniada maikontra iti illegal a droga babaen ti panangarestoda iti maysa a drug personality nga akusado iti sumagmamano a kaso mainaig iti droga iti up-upaanna a kuarto sadiay Barangay Ayudante ditoy siudad idi malem ti Marso 14.

Inaresto dagiti polis ni Elmo Toquero y Soliven, 65, naasawaan, agtartaraken iti padaw, iti kaserana iti Paulina Inn, babaen ti bileg ti warrant of arrest nga inyisio ni Judge Anacleto M. Bañez ti Regional Trial Court Branch 25, Tagudin, Ilocos Sur, gapu iti panaglabsing iti section 11 and 12 ti RA 9165 a nai-docket iti babaen ti Criminal Case No. 1522-T ken 1523-T. Nairekomenda ni Toquero nga agpiansa iti P20,000.00 ken P60,000.00.

Sabali pay nga arrest warrant ti naiyisio maikontra ken ni Toquero gapu iti panaglabsingna iti Section 3 ti RA 9165 a nai-docket it CC No. 1521-T ket awan ti nairekomenda a piansana.

Ad-adda a dimmagsen ti kaso ni Toquero kalpasan a nasalamaan ida dagiti polis a madama ti pot session iti uneg ti kuartona iti Paulina Inn, kaduana ti maysa a Reynaldo Penales y Mapili, 36, awanan asawa ken residente iti Barangay San Juan ditoy met laeng siudad.

Nakakumpiska dagiti operatiba iti medium size heat sealed plastic sachet a nagkarga  iti mapapati a shabu; maysa nga awan kargana a  medium size plastic sachet a masuspetsa nga addaan shabu residue; 3  nga elongated aluminum foil a mapapati nga addaan shabu residue; maysa niga improvised glass totter nga addaan masuspetsa a shabu residue; 3 a babassit a daan a lighter; 2 torch lighters; 3 cellular phones ken  P5,500 a personal a kuartada.

Iti progress report dagiti nangaresto ken ni Toquero, impalgak ti suspek sakbay a maidatag iti korte nga adda nakadulin a paltogna iti kaserana ket insukona kadagiti polis ti maysa nga Armscor Cal. 45 pistol nga addaan iti maysa a magasin ken tallo a bala para iti nasao a kalibre ti paltog.

Segun iti polis, nakalista ni Toquero a top ten drug personality iti Tagudin Municipal Police Station.

Sabali pay a kaso a panaglabsing iti Section 11 ti RA 9165 ti sanguen ni  Toquero, kasta met a naipaiman ti kasoda ken ni Penales iti Opisina ti City Prosecutor, Candon City.#