Drug personality, ginudas suspects riding in tandem.

STA. MARIA, Ilocos Sur – Agtultuloy latta ti pannakaipakni dagiti drug personality ditoy probinsia babaen ti masuspetsa a bihilante a grupo.

Napasamak ti kaudian a naireport a pammaltog sadiay Barangay Maynganay Sur, ditoy nga ili a nakagudasan ti maysa nga opisial ti barangay idi agarup 9:45 ti bigat ti Hulio 27.

Nabigbig ti biktima a ni Loreto Gaoat y Ragudo, 43, naasawaan, negosiante, barangay kagawad ti Barangay San Pablo, San Esteban.

Ngem kas maibatay iti rekord ti San Esteban police station, karaman ni Gaoat iti drug watch list ken adda iti kategoria a pusher ken user.

Iti panagimbestiga ti polis, agdaldaliasat nga agpaabagatan ti Kawasaki Fury motorcycle a minaneho ni Gaoat iti national highway a sakup ti Barangay Maynganay Sur, idi pinaltogan iti sumagmamano a beses ti lalaki a nakasakay iti likud ti drayber ti nangisit a Kawasaki Rouser motorcycle a nagsagrapan ti biktima kadagiti sugat iti nadumaduma a paset ti bagina ken dagus a nakatayanna.

Saan a nabigbig dagiti suspek agsipud ta nakaaruatda iti helmet. Ngem iti panagimbestiga dagiti polis, nakaaruat ti drayber iti puraw a sweatshirt idinto a nangisit a diaket ti tirador.

Mapapati a sinursurot dagiti suspek ti biktima ket pinaltoganda daytoy iti di unay matatao a lugar iti nadakamat a barangay sada dagus nagbuelta a naglibas nga agpaamianan.

Nangiwayat ti polis-Sta. Maria iti pursuit operation ken pinakaammuanda ti Ilocos Sur Police Provincial Office para iti pannakaipasdek ti dragnet wenno checkpoint kadagiti kaparanget a police stations ngem negatibo ti resultana.

Iti inwayat a panagimbestiga ti nagtipon a KIMAT ken SOCO team manipud iti Ilocos Sur Crime Laboratory nga indauluan ni Chief Inspector Leonardo Q. Arce, nakarekobreda iti pito a kapsula manipud iti  mapapati a cal. 45, maysa a bullet jacket ken maysa a deformed slug ti saan nga ammo a kalibre iti nakapasamakan ti pammaltog.

Addan sumagmamano a kaso ti pammaltog iti probinsia a drug personalities dagiti nagudas.

Idi agarup 8:28 ti rabii ti Hulio 19, napaltogan sadiay Barangay Suagayan, Sta. Lucia ni Eduardo Galigaro y Alcantara, aka “Dugal”, 28, residente iti Barangay Parioc 2nd, Candon City.

Nakarekobre ti SOCO team iti lima a kapsula manipud iti cal. 45, sumagmamano a plastic sachet ken aluminum foil a nagkarga iti masuspetsa a shabu residue ken  paper board a nakailanadan ti:  “Wag nyo akong tularan drug pusher adik ako” a naikabil iti abay ti biktima.

Segun iti polis-Candon, adda ti biktima iti watch list dagiti drug personalities iti siudad.

Iti pannakaisurat daytoy, di pay ammo no asino ti nanggudas ken ni Galigaro.

Idi rabii ti Hulio 17, ginudas ti armado a lalaki a nagaruat iti ballcap, puraw a tisirt, camouflage short pants, ken naka-shades ni John Paul Camangeg y Cañas, 37, fish vendor, bayat ti panagbuyana iti telebision, kaduana ti pamiliana, iti uneg ti balayda.

Segun iti polis-Sta. Maria, nakalista ni John Paul a drug pusher/user ken boluntario a simmuko idi Hulio 13.