Drug personality, ginudas ti riding in tandem

BANTAY, Ilocos Sur – Sabali pay a drug personality ti napapatay iti national highway a sakup ti Barangay Taleb, ditoy nga ili idi Agosto 27.

Mapapati a sinigurado dagiti suspek a nagudasen ni Roberto Fillon Mariñas, Jr., 48, naasawaan, ken residente iti Barangay Taleb, ditoy nga ili, sakbay a pinanawanda.

Naitaray ni Mariñas iti Metro Vigan Cooperative Hospital, ngem indeklara ti doktor a nangtaming kenkuana nga awanen ti biagna.

Iti report manipud iti polis ditoy, idi agarup 11:40 ti bigat ti nadakamat a petsa, agdaldaliasat nga agpalaud iti national highway ti Euro motorcycle a minaneho ni Mariñas idi pinaltogan dagiti suspek a nakalugan iti Racal motorcycle.

Naikras ni Mariñas iti abaga ti highway ngem nabaelanna ti timmaray nga immadayo kadagiti pimmaltog kenkuana.

gem kinamat dagiti suspek ket idi maabutanda ni Mariñas iti sanguanan ti Pato’s Store, pinaltoganda manen ti biktima iti sumagmamano a daras a nagsagrapan daytoy kadagiti sugat iti nadumaduma a paset ti bagina.

Maysa a Maricel Tobania y Bersola, 26, naasawaan, ken residente iti Sitio Baoay, Paing a nairana a gumatgatang iti tienda ti nasugatan iti makannawan a sakana babaen iti naiwawa a bala.

Naitaray ni Tobania iti Metro Vigan Cooperative Hospital ket maob-oberba ti kasasaadna.

Kalpasan ti pammaltog, aglibas koman dagiti suspek ngem dida mapagandar ti motorsikloda ket pinanawanda sada naglugan iti kolor natangken a berde a vehikulo a nagpalaud.

Nangipatulod dagiti polis ditoy iti flash alarm kadagiti kabangibangda a police stations para iti pannakatiliw dagiti di nabigbig a suspek ngem negatibo ti resultana.
Nakarekobre ti SOCO team manipud iti Provincial Police Office, Bantay iti sangapulo ket dua a kapsula, 2 a buli, ken maysa a deformed slug manipud iti cal. 45 iti nakapasamakan ti krimen.

Naipan metten ti motorsiklo iti kustodia ti Bantay police station para iti pannakaberipikarna iti Land Transportation Office.

Maipalagip a sumangsango ni Mariñas iti kaso a panaglabsing iti RA 9165 a nakapila iti Regional Trial Court, Branch 21, Vigan City.

Iti kallabes, sumagmamano a drug personality iti probinsia ti napaltogan ken nagudas babaen kadagiti riding in tandem ket masuspetsa a droga ti ramut dagitoy a pammaltog.#