Drug personality, inwalang dagiti hitmen a riding in tandem

NARVACAN, Ilocos Sur – Sabali manen a drug personality ti ginudas dagiti hitmen a nagkalubbon iti motorsiklo sadiay Barangay Sta. Lucia ditoy nga ili idi malem ti Oktubre 5.

Dead on the spot ni Alex Cantoria y Palacpac, 54, balo, empleado ti lokal a gobierno ditoy.

Segun iti polis, nakalista ni Cantoria a drug surrenderer under high value target level 3 iti police station ditoy nga ili.

Iti inbestigasion, agmaymaysa ni Cantoria iti uneg ti balayna nga agbuybuya iti programa ti telebision idi mapaltogan.

Mapapati a nagtugtog iti ridaw ti di nabigbig a suspek a nakaaruat iti bonete ket idi linuktan ni Cantoria, pinaltogan ti suspek iti sumagmamano a beses a nakatiruan ti nadumaduma a paset ti bagi ti biktima.

Kalpasan ti pammaltog, simmakay ti suspek iti agur-uray a motorsiklo a minaneho ti kumplotna a nakaaruat iti helmet ket naglibasda iti amianan a direksion iti daan a nasional a kalsada iti Barangay Sta. Lucia.

Indeklara ni Dr. Diana D. Lim, RHU officer, a dead on the spot ni Cantoria.

Iti agarup 8:15 iti dayta a rabii, nangiwayat ti SOCO team manipud iti Ilocos Sur Police Provincial Office iti panangidaulo ni Chief Inspector Leonardo Arce iti crime scene processing ket nakarekobreda iti walo a kapsula manipud iti cal. 45, dua a naiputok a bala, 4 a deformed a naiputok a bala, maysa a bullet jacket ken metallic fragment.

Immun-una ngem daytoy, idi agsapa ti Oktubre 1, maysa a drug surrenderer ti impaknida sadiay Barangay Macabiag, Sinait, Ilocos Sur.

Naideklara a dead on the spot ni Eisenhower Deocareza y Ipac @ Totoy Bato, 45, naasawaan, residente iti Brgy Rang – ay, Sinait, Ilocos Sur iti Sinait District Hospital a nakaitarayanna.

Kas maibatay iti inbestigasion dagiti polis-Sinait, magmagna ni Deocareza iti Margaay Street, Barangay Macabiag idi immasideg ti dua a di nabigbig a suspek sada pinaltogan ti biktima.

Nabaelan ti biktima ti nagtaray iti balay ti kasinsinna a ni Alfredo Ipac Jr ngem kinamat dagiti suspek sada pinaltogan manen iti sumagmamano a beses a nagsagrapanna iti nadumaduma a sugat iti bagi ken ulona ket nupay naitaray daytoy iti ospital ti ili, saanen a naidanon a sibibiag.

Naglibas dagiti suspek a nagpaabagatan a nakalugan iti nangisit a Honda XRM motorcycle.

Nakarekobre iti crime scene ti SOCO team manipud iti PCLO Ilocos Sur iti innem a kapsula manipud iti cal. 45; 2 a kapsula manipud iti cal. 9MM; 2 naiputok a bala ken 2 deformed a naiputok a bala.

Drug surrenderer ti biktima iti Sinait police idi Hulio 16 ken karaman iti drug watch list HVT level 2.

Agtultuloy ti panagimbestiga dagiti polis mainaig iti nasao a pammaltog. (Tawid News Team)