Drug personality, naiwalang

STA. CRUZ, Ilocos Sur – Maysa manen a drug personality ti naiwalang sadiay Barangay Poblacion Este, ditoy nga ili idinto a masuspetsa a puntiria nga ipakni dagiti armado a tattao ti sabali pay di sinerrekda ti inaladan daytoy sadiay Sitio Magsaysay, Barangay Dan-ar, Santiago, Ilocos Sur idi Septiembre 18.

Idi 6:20 ti bigat ti nadakamat a petsa, nakaawat iti report ti polis-Sta. Cruz a maysa a shooting incident ti napasamak iti Barangay Poblacion Este partikular iti nagsulian ti national highway ken Bio Street.

Nagresponde a dagus dagiti polis ket nadanonda a nakadalutaytay nga awan ti puot ni Paulino Tejada y Javinar, 49, naasawaan, ken residente iti Barangay Poblacion Este, Sta. Cruz, Ilocos Sur iti abay ti motorsiklona a Honda XRM .

Iti panagimbestiga dagiti polis, agpadaya a direksion ni Tejada ket idi makadanon iti nadakamat a lugar, pinaltogan ti/dagiti di nabigbig a suspek a nagsagrapanna kadagiti sugat iti nadumaduma a paset ti bagina.

Naideklara nga awanen ti biag ni Tejada idi naidanon iti ospital.

Iti panangproseso ti SOCO team a nakabase iti Candon City iti crime scene, nakarekobreda iti uppat a kapsula manipud iti cal. 45, maysa a deforemed slug, ken maysa a metal fragment.

Segun iti polis-Sta. Cruz, nakalista ti biktima a No. 2 iti drug watch list iti sakupda a lugar.

Kabayatanna, mismo a ni Punong Barangay ti Dardarat Federico Gaoat ti nangireport iti police station ti Santiago a dua nga armado a tattao ti nagputokputok iti uneg ti inaladan ni Salve Cobales y Norcio, 47, natibo iti Lao-ang, Samar, Leyte ngem agnaeden iti Sitio Magsaysay, Barangay Dan-ar.

Mapapati a simrek lattan dagiti suspek iti inaladan ni Cobales ket binirokda daytoy.

Nagputokputok dagiti di nabigbig a suspek idi maammuanda manipud ken ni Salve nga awan ni Jesus a lakayna ket natiruan pay ti maysa a motorsiklo a nakaparking iti sango ti balay.

Nagnagna a naglibas dagiti suspek iti saan nga ammo a direksion.

Suspetsa ti polis a gandat a paltogan dagiti armado a suspek ni Jesus no nadatnganda iti balay daytoy.

Nupay saan a nakalanad iti report, segun iti mapagpiaran a source, maysa daytoy a drug personality.#